रंग लगाइएको मासको दाल नष्ट, कर बीजक नराख्ने डिस्ट्रिब्युटरलाई १० हजार जरिवाना

समाचार

गृहपृष्ठ
समाचार
रंग लगाइएको मासको दाल नष्ट, कर बीजक नराख्ने डिस्ट्रिब्युटरलाई १० हजार जरिवाना

रंग लगाइएको मासको दाल नष्ट, कर बीजक नराख्ने डिस्ट्रिब्युटरलाई १० हजार जरिवाना

मंगलबार, साउन १९, २०८३ बागेश्वरी पोस्ट

रविन्द्र घिमिरे-नेपालगञ्ज । नेपालगञ्जमा बजार अनुगमन गरिएको छ । मंगलबार गरिएको अनुगमनका क्रममा रंग लगाइएको मासको दाल भेटिएपछि नष्ट गरिएको छ भने कर बीजक नराख्ने डिस्ट्रिब्युटरलाई १० हजार रुपैयाँ जरिवाना गरिएको छ ।

जिल्ला प्रशासन कार्यालय बाँकेका सहायक प्रमुख जिल्ला अधिकारी एवम् अनुगमन संयोजक महेश गुरुङको नेतृत्वमा गरिएको संयुक्त बजार अनुगमनका क्रममा नेपालगञ्ज–१८ स्थित आकाश राइस मिलबाट सेतु विक चोकस्थत राहुल खाद्यान्न तथा किराना पसलमा बिक्री गरिएको करिब २० किलो र मिलमै भेटिएको १० किलो मासको दालमा अखाद्य रङ (कलर) लगाइएको भेटिएपछि मुचुल्का गरी नष्ट गरिएको सहायक प्रमुख जिल्ला अधिकारी गुरुङले जानकारी दिए ।

अनुगमनका क्रममा राइस मिलको व्यवस्थापन समेत अत्यन्त कमजोर पाइएको सहायक प्रमुख जिल्ला अधिकारी गुरुङले जानकारी दिए । खाद्य सुरक्षासम्बन्धी मापदण्ड पालना गर्न मिल सञ्चालकलाई निर्देशन समेत दिइएको छ ।

त्यसैगरी, सेतु विक चोकस्थित गौरी मार्टमा अनुगमन गर्दा केही उपभोग्य वस्तुको म्याद समाप्त (एक्सपायरी) भइसकेको भेटिएको छ । त्यस्ता सामग्री हटाउन तथा बिक्री नगर्न सम्बन्धित व्यवसायीलाई निर्देशन दिइएको छ ।

यस्तै, नेपालगञ्ज २ स्थित न्यू श्रीस डिस्ट्रिब्युटर्सले कर बीजक नराखी ग्यासको कारोबार गरेको पाइएपछि रु. १० हजार जरिवाना गरिएको छ । पसलहरुले मूल्यसूची राखे पनि अद्यावधिक गरेका छैनन् । पुरानै मूल्यसूची राखेको भेटिएको छ ।

जिल्ला प्रशासन कार्यालय बाँकेले उपभोक्ताको स्वास्थ्य र अधिकार संरक्षणका लागि बजार अनुगमनलाई निरन्तरता दिइने जनाएको छ ।

अनुगमन टोलीमा जिल्ला प्रशासन कार्यालय, आन्तरिक राजश्व कार्यालय, खाद्य प्रविधि तथा गुण नियन्त्रण कार्यालय, बाणिज्य, आपूर्ति तथा उपभोक्ता संरक्षण कार्यालय, घरेलु तथा साना उद्योग कार्यालय, नेपालगञ्ज उपमहानगरपालिका कार्यालय, उपभोक्ता हित संरक्षण मञ्च, नेपाल पत्रकार महासंघका प्रतिनिधि सहभागी थिए ।

प्रकाशित मिति: मंगलबार, साउन १९, २०८३ २०:५३

प्रतिक्रिया दिनुहोस्