रेडक्रसकर्मीलाई सेफगार्डिङ्गसम्बन्धी अभिमुखीकरण

समाचार

गृहपृष्ठ
समाचार
रेडक्रसकर्मीलाई सेफगार्डिङ्गसम्बन्धी अभिमुखीकरण

रेडक्रसकर्मीलाई सेफगार्डिङ्गसम्बन्धी अभिमुखीकरण

मंगलबार, साउन १९, २०८३ बागेश्वरी पोस्ट

नेपालगञ्ज । नेपाल रेडक्रस सोसाइटी केन्द्रीय कार्यालयको आयोजनामा बाँकेमा सेफगार्डिङ्गसम्बन्धी अनिवार्य अभिमुखीकरण कार्यक्रम गरिएएको छ ।

‘यौन शोषण, दुव्र्यवहार तथा उत्पीडनप्रति शून्य सहनशीलता, हाम्रो प्रतिबद्धता’ भन्ने नारासहित सञ्चालन गरिएको अभिमुखीकरणमा नेपाल रेडक्रस सोसाइटी बाँके शाखाका स्वयंसेवक तथा कर्मचारीलाई दुई चरणमा एक–एक दिने तालिम प्रदान गरिएको छ ।

नेपाल रेडक्रस सोसाइटीको लैङ्गिक तथा समावेशीकरण विभागका निर्देशक दिव्यराज पौडेलका अनुसार यस्तै अभिमुखीकरण कार्यक्रम अन्य जिल्ला शाखाहरूमा पनि चरणबद्ध रूपमा सञ्चालन भइरहेको छ ।

अभिमुखीकरणमा यौन दुराचार, यौन शोषण, यौन दुर्व्यवहार तथा यौन उत्पीडनका अवधारणाबारे स्पष्ट जानकारी गराउनुका साथै यस्ता घटना भएमा उजुरी गर्ने प्रक्रिया, प्रेषण (रेफरल) प्रणाली तथा असल आचरण र व्यावसायिक व्यवहारका विषयमा सहभागीलाई जानकारी गराइएको थियो ।

कार्यक्रममा महिला, पुरुष तथा लैङ्गिक एवं यौनिक अल्पसङ्ख्यक सबै व्यक्ति यौन दुराचारको जोखिममा पर्न सक्ने, यौन दुराचार गम्भीर अपराध भएकाले कानुन बमोजिम कारबाही हुने तथा घर, समुदाय, सार्वजनिक सेवा स्थल र कार्यस्थल लगायत जहाँसुकै पनि यस्ता घटना हुन सक्ने भएकाले सबैले सचेत रहन र अरूलाई पनि सचेत गराउनुपर्नेमा जोड दिइएको थियो ।

सुरक्षित कार्यस्थल, सुरक्षित समुदाय र सुरक्षित रेडक्रसकर्मीको अवधारणालाई व्यवहारमा उतार्न सेफगार्डिङ्गका मापदण्ड अनुसार रेडक्रसभित्र संस्थागत अवस्थाको मूल्याङ्कन तथा जाँच प्रक्रिया पनि सुरु गरिएको जानकारी दिइएको छ ।

नेपाल रेडक्रस सोसाइटी बाँके शाखाका सभापति गोवर्धन सिंह सम्झनाको अध्यक्षतामा सम्पन्न कार्यक्रममा नेपाल रेडक्रस सोसाइटीका पूर्व केन्द्रीय उपाध्यक्ष अजीतकुमार शर्मा, निवर्तमान महामन्त्री मीनबहादुर मल्ल, जिल्ला कार्यसमितिका पदाधिकारी, सदस्य तथा कर्मचारीहरूको सहभागिता रहेको थियो ।

कार्यक्रमका सहजकर्तामा नेपाल रेडक्रस सोसाइटीको लैङ्गिक तथा समावेशीकरण विभागका निर्देशक पौडेल, सुवेक्षा मानन्धर, ईश्वरी पन्त तथा ब्रिटिस रेडक्रसकी प्रतिनिधि गीता पाण्डे रहेका थिए ।

प्रकाशित मिति: मंगलबार, साउन १९, २०८३ २१:३२

प्रतिक्रिया दिनुहोस्