भोटेकोशी बाढीमा ९५ जनाको मृत्यु, दर्जनौं सम्पर्कविहीन

समाचार

गृहपृष्ठ
समाचार
भोटेकोशी बाढीमा ९५ जनाको मृत्यु, दर्जनौं सम्पर्कविहीन

भोटेकोशी बाढीमा ९५ जनाको मृत्यु, दर्जनौं सम्पर्कविहीन

बुधबार, भदौ १०, २०८३ बागेश्वरी पोस्ट

काठमाडौं । भोटेकोशी नदीमा आएको भीषण बाढीका कारण रसुवा र नुवाकोटका विभिन्न क्षेत्रमा ठूलो जनधनको क्षति भएको छ । प्रधानमन्त्री तथा मन्त्रिपरिषद्को कार्यालयका अनुसार बुधबार साँझ ७ बजेसम्म बाढी प्रभावित क्षेत्रमा ९५ जनाको शव फेला परेको छ भने ठूलो संख्यामा मानिस सम्पर्कविहीन छन् ।

बाढीका कारण प्रभावित क्षेत्रमा कार्यरत ४४ जना नेपाली सेना, २८ जना नेपाल प्रहरी र १३ जना सशस्त्र प्रहरीका सुरक्षाकर्मी सम्पर्कविहीन रहेको प्रारम्भिक विवरणमा उल्लेख छ । यस्तै, प्रभावित क्षेत्रमा रहेका ३९१ जना विदेशी र ९३ जना स्वदेशी पर्यटक तथा विभिन्न विद्युत् आयोजनामा कार्यरत ६० जना कर्मचारी पनि सम्पर्कविहीन रहेको जनाइएको छ ।

बाढीले भौतिक पूर्वाधारमा समेत व्यापक क्षति पुर्‍याएको छ । प्रारम्भिक विवरण अनुसार १९ वटा मोटरेबल पुल र करिब ४० किलोमिटर सडक क्षतिग्रस्त भएका छन् । मानवीय तथा भौतिक क्षतिको थप विवरण संकलन भइरहेको प्रधानमन्त्री कार्यालयले जनाएको छ ।

सरकारले उद्धार तथा राहतलाई तीव्र बनाउन नेपाली सेना र निजी क्षेत्रका हेलिकप्टर परिचालन गरेको छ । घाइतेको उपचारका लागि नुवाकोट जिल्ला अस्पतालसहित विभिन्न अस्पतालमा नेपाली सेना, नेपाल प्रहरी, सशस्त्र प्रहरी, राष्ट्रिय ट्रमा सेन्टर, वीर अस्पताल र त्रिवि शिक्षण अस्पतालबाट स्वास्थ्य टोली खटाइएको छ । बाढीबाट घाइते भएका २१ जनाको रसुवा अस्पतालमा उपचार भइरहेको र ३६ जनालाई उद्धार गरी काठमाडौं ल्याएर विभिन्न अस्पतालमा उपचार भइरहेको जनाइएको छ ।

सरकारले प्रभावित क्षेत्रका बासिन्दालाई सुरक्षित स्थानमा बस्न, नदी किनारमा नजान तथा उच्च सतर्कता अपनाउन आग्रह गरेको छ । उद्धार, खोज तथा राहत कार्यलाई तीव्र पार्दै थप क्षति न्यूनीकरण तथा विस्थापित परिवारको सुरक्षित पुनःस्थापनालाई प्राथमिकतामा राखिएको छ ।

May be an image of ticket stub and text May be an image of text