क्वारेन्टाइनका लागि रेडक्रसद्वारा नरैनापुरलाई सामग्री सहयोग,अहिलेसम्म एक सय जना क्वारेन्टाइनमा

समाचार

गृहपृष्ठ
समाचार
क्वारेन्टाइनका लागि रेडक्रसद्वारा नरैनापुरलाई सामग्री सहयोग,अहिलेसम्म एक सय जना क्वारेन्टाइनमा

क्वारेन्टाइनका लागि रेडक्रसद्वारा नरैनापुरलाई सामग्री सहयोग,अहिलेसम्म एक सय जना क्वारेन्टाइनमा

सोमबार, चैत १७, २०७६ बागेश्वरी पोस्ट

नरैनापुर(बाँके) । बाँकेको नरैनापुर गाउँपालिकामा सञ्चालित क्वारेन्टाइनका लागि नेपाल रेडक्रस सोसाइटी बाँके शाखाले विभिन्न सामग्री सहयोग गरेको छ ।

नेपालगञ्जमा आज रेडक्रसले गाउँपालिकाका अध्यक्ष इस्तियाक अहमद शाहलाई विभिन्न सामग्री हस्तान्तरण गरेको हो । पछिल्लो समय भारतबाट आएका ठूलो संख्याका स्थानीयलाई वडा नम्बर ६ स्थित जयकिसान माविमा क्वारेन्टाइन बनाएर राखिएपछि सामग्रीको अभाव भएका बेला रेडक्रसको सहयोगले सहज भएको अध्यक्ष शाहले बताउनुभयो ।

रेडक्रसले कम्बल, झुल र मेट २५/२५ थान तथा मग, साबुन र बाल्टी ५/५ थान र त्रिपाल १० थान सहयोग गरेको छ । अहिलेसम्म भोजपुरको जयकिसान माविमा ७४ जना र नेपालगञ्जको एक होटलमा २६ जना गरी एक सय जना क्वारेन्टाइनमा छन् ।

‘कसैलाई पनि बसाईं र खानपिनमा अप्ठेरो नहोस् भनेर हामीले निरिक्षण गरेका छौं, उहाँहरु सबै स्वास्थ्यकर्मीको निगरानीमा हुनुहुन्छ, स्वस्थ नै हुनुहुन्छ तर १४ दिन क्वारेन्टाइनमा राख्नुपर्ने भएकाले बसाएका छौं,’ अध्यक्ष शाहले भन्नुभयो ।

उहाँले मजदुरी गर्न गएका नरैनापुरका स्थानीय भारतबाट आउने क्रम जारी नै रहेकाले व्यवस्थापनमा चुनौति भएपनि उचित प्रबन्ध मिलाउन लागिपरेको बताउनुभयो । स्वास्थ्य शाखा प्रमुख मोइन खाँले विभिन्न चुनौतिका बाबजुद् गाउँपालिकामा पछिल्लो समय बाहिरी देशबाट आएका स्थानीयको खोजी गरी गाउँपालिकाको क्वारेन्टाइन वा घरमै आइसोलेशनमा बस्ने गरी व्यवस्थापन गरिएको बताउनुभयो ।

स्वास्थ्य शाखा उपप्रमुख नागेन्द्र कुमार शाहले वडा नम्बर ४ खोदवाँस्थित नेपाल राष्ट्रिय प्राथमिक विद्यालयमा रहेको क्वारेन्टाइनमा भारतबाट आएका चार जनालाई आज स्वास्थ्य चेकजाँच गर्दा अवस्था सामान्य भएकाले होम क्वारेन्टाइनमा बस्ने गरी पठाइएको बताउनुभयो ।

प्रकाशित मिति: सोमबार, चैत १७, २०७६ २०:५८

प्रतिक्रिया दिनुहोस्