आज विश्वकर्मा पूजा, नेपालगन्जमा पनि धुमधामले मनाइँदै

समाचार

गृहपृष्ठ
समाचार
आज विश्वकर्मा पूजा, नेपालगन्जमा पनि धुमधामले मनाइँदै

आज विश्वकर्मा पूजा, नेपालगन्जमा पनि धुमधामले मनाइँदै

बिहीबार, असोज १, २०८३ बागेश्वरी पोस्ट

नेपालगन्ज । आज विश्वकर्मा पूजा मनाइँदैछ । हरेक वर्ष कन्या संक्रान्तिका दिन मनाइने विश्वकर्मा पूजाका अवसरमा नेपालगन्जका विभिन्न कलकारखाना तथा वर्कसपमा विशेष चहलपहल देखिएको छ ।

हिन्दू धर्मावलम्बीहरूले भगवान विश्वकर्माको जन्मदिनका रूपमा विश्वकर्मा जयन्ती मनाउने गर्छन् । यस अवसरमा कलकारखाना, उद्योग तथा निर्माणसम्बन्धी काम हुने स्थानमा भगवान विश्वकर्माको तस्वीर वा मूर्ति स्थापना गरी विधिपूर्वक पूजाआराधना गरिन्छ ।

विश्वकर्मा पूजाका लागि नेपालगन्जका विभिन्न कलकारखाना तथा वर्कसपलाई सजाउने, सरसफाइ गर्ने र पूजाको तयारी गर्ने क्रम चलेको छ । श्रमिक तथा कालिगढहरूले आफ्नो काममा प्रयोग हुने औजार, मेसिन तथा उपकरणको पूजा गरी विश्वकर्मा दिवस मनाउने गर्छन् ।

धार्मिक विश्वास अनुसार यस दिन औजार तथा उपकरणको पूजा आराधना गरेमा तिनको आयु बढ्ने, कामका क्रममा बिग्रिने समस्या कम हुने तथा राम्रो काम गर्न सकिने विश्वास छ । पूजाका लागि स्थापना गरिएका बालुवा तथा अन्य सामग्रीबाट निर्मित विश्वकर्माका मूर्तिहरूलाई पूजा पश्चात् नजिकका नदी वा अन्य शुद्ध स्थलमा लगेर विसर्जन गर्ने परम्परा पनि रहेको छ ।

नेपालगन्जमा पनि विश्वकर्मा पूजालाई लक्षित गरी विभिन्न स्थानमा भगवान विश्वकर्माका मूर्ति तथा तस्वीर सजाएर पूजा गरिएको छ ।

प्रकाशित मिति: बिहीबार, असोज १, २०८३ १०:३९

प्रतिक्रिया दिनुहोस्