क्वारेन्टाइनमा कुनै पनि असुविधा हुन नदिने नरैनापुरको निर्णय

समाचार

गृहपृष्ठ
समाचार
क्वारेन्टाइनमा कुनै पनि असुविधा हुन नदिने नरैनापुरको निर्णय

क्वारेन्टाइनमा कुनै पनि असुविधा हुन नदिने नरैनापुरको निर्णय

शुक्रबार, चैत २१, २०७६ बागेश्वरी पोस्ट

नरैनापुर(बाँके)। कोरोना भाइरस विरुद्धको अभियानलाई प्रभावकारी बनाउन बाँकेको नरैनापुर गाउँपालिकाका जनप्रतिनिधि र कर्मचारीहरुको बैठकले विभिन्न निर्णय गरेको छ ।

गाउँपालिकाका अध्यक्ष इस्तियाक अहमह शाहको अध्यक्षतामा जय किसान माविमा बनाइएको क्वारेन्टाइन स्थलमा शुक्रबार भएको बैठकले क्वारेन्टाइनमा रहेका ब्यक्तिहरुलाई कुनै पनि असुबिधा हुन नदिनका लागि ब्यापक तयारीका साथ अगाडि बढ्ने निर्णय गरेको छ ।

जयकिसान माविको क्वारेन्टाइनमा भारतबाट मजदुरी गरेर फर्केका १ सय ५० को संख्यामा रहेका ब्यक्तिहरुको झुल, खानेपानी, साबुन, निर्धारित मापदण्ड अनुसार खाजा नास्ता, शौचालय र स्वास्थ्य परीक्षण लगायतको ब्यवस्थापन गर्नको लागि जिम्मेवारी समेत बाँडफाँड गरेको नरैनापुर गाउँपालिकाका सूचना अधिकारी लक्ष्मीकान्त मिश्राले बताउनुभयो । यसैगरी भारतीय सीमाबाट अझैं पनि लुकीछुपी नेपालीहरु घर फर्किरहेको पाइएकाले सीमा क्षेत्रमा कडा सुरक्षा ब्यवस्था गरी सीमा नाकाबाट आवतजावतमा पूर्ण प्रतिबन्ध लगाउने निर्णय समेत गरिएको सूचना अधिकारी मिश्राले बताउनुभयो ।

कोरोना भाइरसको जोखिम न्युनीकरण गर्न सरकारले लागू गरेको ‘लकडाउन’का कारण गैरश्रमिक, बिपन्न परिवार तथा असहाय परिवारहरुमा खाद्यान्न तथा अन्य आवश्यक सामग्रीको अभाव हुन नदिन त्यस्ता परिवारहरुको तथ्यांक संकलन गरी उनीहरुलाई गाउँपालिका मार्फत् एकद्वार प्रणाली अन्र्तगत् यथाशिघ्र राहत सामग्री उपलब्ध गराउन सम्पूर्ण वडालाई जिम्मा दिने बैठकमा निर्णय गरिएको गाउँपालिका अध्यक्ष शाहले बताउनुभयो ।

‘लकडाउन’ का कारण बढी मारमा परेको गैर श्रमिक, बिपन्न परिवार तथा असहाय परिवारहरुलाई राहत प्याकेज अन्तर्गत् २० किलो चामल, २ किलो दाल, १ बोतल खाने तेल तथा १ प्याकेट नुन उपलब्ध गराउने गाउँपालिका अध्यक्ष शाहले बताउनुभयो । गाउँपालिकाले यसअघि ‘कोरोना भाइरस संक्रमण उपचार कोष’ खडा समेत गरेको छ ।

गाउँपालिकाले १५ लाखको कोष खडा गरेर बिहिवारदेखि खाता संचालन गरेको प्रमुख प्रशासकीय अधिकृत मणिराम खरालले जानकारी दिनुभयो। कोेषमा गाउँपालिका अध्यक्ष शाहले ब्यक्तिगत २५ हजार रुपैयाँ जम्मा गरेर कोषको स्थापना गरेको प्रमुख प्रशासकीय अधिकृत खरालले बताउनुभयो । अध्यक्ष शाहले कोषमा सक्दो रकम जम्मा गरेर कोरोना विरुद्ध गाउँपालिकाले थालेको अभियानमा सहयोग गर्न सबैमा अपिल समेत गर्नुभएको छ ।

प्रकाशित मिति: शुक्रबार, चैत २१, २०७६ २२:०१

प्रतिक्रिया दिनुहोस्