मनकारी वडा अध्यक्ष बेहनाद्वारा बाँकेका विओपीहरुमा सहयोग

समाचार

गृहपृष्ठ
समाचार
मनकारी वडा अध्यक्ष बेहनाद्वारा बाँकेका विओपीहरुमा सहयोग

मनकारी वडा अध्यक्ष बेहनाद्वारा बाँकेका विओपीहरुमा सहयोग

बुधबार, वैशाख ३, २०७७ बागेश्वरी पोस्ट

नेपालगन्ज । दिनरात सीमामा खटिरहेका सशस्त्र प्रहरीहरुलाई नेपालगञ्ज उपमहानगरपालिका वडा नम्बर ४ का वडा अध्यक्ष मोहम्मद सफिक बेहनाले ब्यक्तिगत सहयोग गर्ने क्रम जारी नै राख्नुभएको छ ।
यो क्षेत्रमा समाजसेवा गरेर कहिल्यै नथाक्ने छवि बनाउनुभएका वडा अध्यक्ष बेहनाले आज सीमा सुरक्षार्थ खटिएका विभिन्न बोर्डर आउट पोष्ट (विओपी) र फरवार्ड वेसहरुमा पुगेर सशस्त्र प्रहरीहरुलाई पानी, ग्यालिन, स्यानीटाइजर र सावुन वितरण गर्नुभएको हो । जानकी गाउँपालिकाको बढैयास्थित विओपी, त्यसको फरवार्ड वेस, नेपालगञ्ज १६ जयसपुरस्थित विओपी, डुडुवाको कालाबञ्जर विओपी र त्यसको खडैंचास्थित फरवार्ड वेसमा ती सामग्री हस्तान्तरण गर्नुभएको सशस्त्र प्रहरी बल ३० नम्बर गण बागेश्वरीका प्रहरी उपरिक्षक दिपक अधिकारीले बताउनुभयो ।
रातदिन सीमामा खटिरहेका प्रहरीहरुको सहजताका लागि वडा अध्यक्ष बेहनाले गर्नुभएको सहयोगप्रति आभार व्यक्त गर्दै प्रहरी उपरिक्षक अधिकारीले भन्नुभयो–‘उहाँले हामीलाई निरन्तर सहयोग गरिरहनुभएको छ, अहिले भारतबाट मानिसहरु चोरबाटो भएर नेपाल भित्रिन सक्ने अवस्थालाई मध्यनजर गर्दै एक किलोमिटर भन्दा पनि कमको दुरीमा सशस्त्र प्रहरी खटाइएको छ, रातदिन नभनेर खटेका प्रहरीहरुलाई उहाँको सहयोगले ठूलो अर्थ राख्छ ।’ अध्यक्ष बेहनाले प्रत्येक विओपीमा ८ कार्टुन पानी, ६ वटा जार पानी, १० लिटरको १० वटा ग्यालिन, २५ गोटा साबुन र ६ वटा सेनीटाइजर प्रदान गरेको बताउनुभयो ।

त्यस्तै दशगजामा बसेका प्रत्येक प्रहरीहरुलाई पनि पानी वितरण गरेको अध्यक्ष वेहनाले जानकारी दिनुभयो । पत्रकार सौरभ गिरी र ३० नम्बर गणका सशस्त्र प्रहरी सहायक निरिक्षक तीर्थ भाटले हिजो सबै विओपीहरुको अनुगमन गर्नुभएको थियो । त्यसकै आधारमा आफूले सहयोग गरेको बेहनाले बताउनुभयो । ‘मलाई आफ्नै वडामा पनि जनतालाई राहतको कमी हुन नदिन अहोरात्र खट्नुपर्ने अवस्था छ, सीमा सुरक्षा र भारतबाट हुन सक्ने नेपाल प्रवेशलाई रोक्न दशगजामा रातदिन खटिरहनुभएका प्रहरी साथीहरुलाई सहयोग गर्नुपर्छ भन्ने लाग्यो, त्यसकारण तत्कालका लागि फिल्डमै गएर यी सामग्रीहरु प्रदान गरेको हुँ,’ अध्यक्ष बेहनाले भन्नुभयो । बेहनाले थप्नुभयो–‘म त मान्छेहरुको दुःख हेर्नै सक्दिनँ, जतिसके सहयोग गर्नै मन लाग्छ ।’ बेहनाले यसअघि पनि सशस्त्र प्रहरीलाई नै २ किलोमिटरसम्म देखिने आधुनिक टर्च लाइट २० थान सहयोग गर्नुभएको थियो ।