चौतर्फी दवावपछि अध्यादेश फिर्ता लिने तयारी गर्दै प्रधानमन्त्री

राजनीति

गृहपृष्ठ
राजनीति
चौतर्फी दवावपछि अध्यादेश फिर्ता लिने तयारी गर्दै प्रधानमन्त्री

चौतर्फी दवावपछि अध्यादेश फिर्ता लिने तयारी गर्दै प्रधानमन्त्री

बिहीबार, वैशाख ११, २०७७ बागेश्वरी पोस्ट

काठमाडौँ । चौतर्फी विरोधपछि नेकपा अध्यक्ष तथा प्रधानमन्त्री केपी शर्मा ओलीले अध्यादेश फिर्ता लिने तयारी सुरु गरेका छन् । सरकारको सिफारिसमा राष्ट्रपति विद्या भण्डारीले दुई अध्यादेश जारी गरेपछि छोटो समयमा नै धेरै राजनीतिक घटनाक्रम विकास भएपछि ओली अध्यादेश फिर्ता लिन सकरात्मक बनेका हुन् ।

सरकारको सिफारिसमा राष्ट्रपति विद्यादेवी भण्डारीले दलसम्बन्धी ऐन, २०७३ र संवैधानिक परिषद् (काम, कर्तव्य र अधिकार) सम्बन्धी ऐन, २०६६ मा संशोधन गर्ने अध्यादेश जारी गरेकी थिइन् ।

बुधबार राति नेकपाका दुई दर्जन हाराहारी स्थायी समिति सदस्यले अध्यादेश फिर्ता लिन र स्थायी समितिको बैठक बोलाउन आह्वान गर्दै हस्ताक्षर नै संकलन गरेका छन् । प्रधानमन्त्रीकै कदमका कारण बुधबार राति समाजवादी पार्टी र राजपाबीच एकता समेत भइसकेको छ ।

यसअघि अध्यक्ष ओलीले अन्य दलहरु फुटाउनका लागि अध्यादेश ल्याएको तर्क गरेका थिए ।

विकसित घटनाक्रमबारे छलफल गर्न बिहीबार बिहान नेकपाका अध्यक्ष पुष्पकमल दाहाल प्रचण्डसँगको भेटमा उनले अध्यादेशले नकारात्मक विवाद सिर्जना गरेको भन्दै आफू फिर्ता लिन तयार भएको बताएका थिए । नेकपाका एक नेताका अनुसार यसका लागि प्रधानमन्त्रीले नेकपाका शीर्ष नेता र कानून व्यवसायीसँग छलफल सुरु गरिसकेका छन् ।

उनले बिहीबार बिहान प्रचण्ड र माधव कुमार नेपालसँग छुट्टाछुटै छलफल गरिसकेका छन् । नेकपा उच्च स्रोतका अनुसार तीनैजना नेता अध्यादेश फिर्ता लिने सहमतिमा पुगेका छन् ।

नेपालको संविधानको धारा ११४ को उपधारा २ ‘ख’मा सरकारको सिफारिसमा राष्ट्रपतिले अध्यादेश खारेज गर्न सक्ने व्यवस्था छ । बालुवाटारसँगै राष्ट्रपति कार्यालयले पनि यसबारे परामर्श सुरु गरिसकेको बताइएको छ । साझापोस्टबाट

प्रकाशित मिति: बिहीबार, वैशाख ११, २०७७ १६:४२

प्रतिक्रिया दिनुहोस्