लकडाउन : बाँकेको सीमामा दिनरात पहरा दिँदै सशस्त्र प्रहरी

समाचार

गृहपृष्ठ
समाचार
लकडाउन : बाँकेको सीमामा दिनरात पहरा दिँदै सशस्त्र प्रहरी

लकडाउन : बाँकेको सीमामा दिनरात पहरा दिँदै सशस्त्र प्रहरी

बुधबार, वैशाख १७, २०७७ बागेश्वरी पोस्ट

नेपालगन्ज । देश एक महिना भन्दा लामो समयदेखि लकडाउनमा छ । कोरोनाको संक्रमण बढ्न नदिन नेपाल भारत सीमा नाका सबै शिल गरिएको छ ।

विगतदेखि नै सीमा क्षेत्रको सुरक्षामा खटिँदै आएको सशस्त्र प्रहरीलाई यतिबेला सीमा क्षेत्रबाट लुकीछिपी हुनसक्ने आवागमनलाई रोक्ने अझ ठूलो जिम्मेवारी थपिएको छ । देश सीमामा सशस्त्र प्रहरीको भरोसामा छ । बाँके जिल्लाको ६५ किलोमिटर सीमा क्षेत्रको प्रत्येक १ सय मिटरको दुरीमा बसेर सशस्त्र प्रहरी यतिबेला रातदिन नभनेर कर्तब्यपालनामा जुटेको छ । भोक तिर्खा नभनी अनिँदा आँखा बनाएर सुरक्षा दिँदै उनीहरु एकदम चनाखो भएर नेपालबाट भारत तथा भारतबाट नेपालमा घुसपैठ हुने सक्ने अवस्थालाई कडाईका साथ निगरानी गरिरहेका छन् । हातमा पञ्जा र राइफल र लाठी, मुखमा मास्क लगाएर सीमामा सुरक्षा गर्दै गरेका उनीहरु भन्छन्–‘देशको सेवा गर्न पाउँदा धेरै खुसी लागेको छ । पहिला नि गथ्र्यौं तर अहिले देशलाई महामारीबाट बचाउन अग्रपंक्तिमा बसेर काम गर्दा खुसीको महसुस भएको छ ।’

सीमामा तैनाथ सशस्त्र प्रहरी भन्छन्,‘सबैभन्दा चनाखो हुनुपर्ने समय भनेकै राति १० बजेदेखि विहानसम्म नै हो ।’ सशस्त्र प्रहरीको कडाईले गर्दा घुसपैठ हुन नपाएको नरैनापुरका स्थानीयहरु बताउँछन् ।

अहिले बाँकेमा सशस्त्र प्रहरीका ६ वटा बिओपी र पाँचवटा फरवार्ड बेश रहेका छन् । बिओपीले टेण्ट राखी सीमाका सबै स्थानमा सुरक्षा ब्यबस्था निकै कडा पारेको छ । सशस्त्र प्रहरीले बाँकेमा रातमा होस् या दिनमा भारत जान खोज्दै गरेका दर्जनांैलाई पक्राउ गरी क्वारेन्टाइन पठाइसकेको छ भने भारतबाट बाँके भित्रिन खोज्नेलाई उतै फर्काएको छ ।

सशस्त्र प्रहरीको सुरक्षा कडाईले बाँकेबासीलाई धेरै राहत मिलेको स्थानीय बताउँछन् ।