सम्वाद्को पहलपछि सांसद्को अग्रसरतामा नेपालगञ्जका लागि २५० परिक्षण किट पठाइयो

समाचार

गृहपृष्ठ
समाचार
सम्वाद्को पहलपछि सांसद्को अग्रसरतामा नेपालगञ्जका लागि २५० परिक्षण किट पठाइयो

सम्वाद्को पहलपछि सांसद्को अग्रसरतामा नेपालगञ्जका लागि २५० परिक्षण किट पठाइयो

सोमबार, वैशाख २२, २०७७ बागेश्वरी पोस्ट

नेपालगञ्ज । कोरोना(कोभिड–१९)को स्वास्थ्य परिक्षणको दायरालाई बढाइनु पर्ने भन्दै आवश्यक स्वास्थ्य सामग्रीको पहल गर्ने प्रतिवद्धता व्यक्त गरेका बाँकेका सांसद्हरुले आज स्वास्थ्यमन्त्रीको ध्यानाकर्षण गराएका छन् ।

नेपालगञ्जमा १६ जनामा कोरोना संक्रमण देखिएपछि थप कोरोना परिक्षण किट, स्वास्थ्य सामग्री, प्राविधिकसहितको उपकरणहरुको माग गर्दै सांसद्हरुले आज स्वास्थ्यमन्त्री भानुभक्त ढकाललाई मन्त्रालयमै भेटेर ध्यानाकर्षण गराएका हुन् ।

सम्वाद समूह बाँकेको पहलमा शनिबार गरिएको भिडियो सम्वादमा संघीय एवं प्रदेश सांसद्हरुले आवश्यक पहलका लागि प्रतिवद्धता व्यक्त गरेका थिए । विभिन्न पार्टीको समेत प्रतिनिधित्व गर्नुहुने ५ जना सांसद्हरुले कोरोना रोकथाम र नियन्त्रणको लागि तत्काल उचित पहल गर्न माग गरेपछि स्वास्थ्यमन्त्रीले तत्काल २५० थान किट नेपालगञ्ज पठाउन निर्देशन दिनुभएको हो ।

स्वास्थ्य मन्त्री ढकालसँगको भेटमा नेपालगञ्जलाई उच्च प्राथमिकतामा राखेर थप आइसोलेशन निर्माण, आवश्यक सामग्री उपलव्धता लगायतको अनुरोध गरिएको पुर्वमन्त्री तथा बाँके क्षेत्र नम्बर २ का सांसद् मोहम्मद इस्तियाक राईले जानकारी दिनुभयो । ढकालले प्राविधक टोलीसहित अन्य स्वास्थ्य सामग्री पठाइने प्रतिवद्धता जनाउनु भएको भेटमा सहभागी सांसद् महेश्वर गहतराज(अथक)ले बताउनुभयो । सांसद् अथकले भयावह स्थितिलाई मध्यनजर गर्दै परिक्षणको दायरालाई बढाउनुपर्ने माग गरिएको बताउनुभयो ।

सांसद्सँगको भेटमा स्वास्थ्यमन्त्री ढकालले नेपालगञ्जको अवस्थालाई निकै गम्भीरतापूर्वक लिइएको बताउँदै कोरोना रोकथामका लागि सम्पूर्ण कार्य गरिने विश्वास दिलाउनुभएको समेत अथकले जनाउनुभयो । भेटमा पुर्वमन्त्री राई, सांसद् अथक लगायत बाँके क्षेत्र नम्बर ३ का सांसद् नन्दलाल रोकाया, बाँकेबाट समानुपातिक सांसद्हरु पुर्णा कुमारी सुवेदी र सर्वतआरा खानम हुनुहुन्थ्यो ।

नेपालगञ्जमा शुक्रवार एक जना ६० वर्षिय पुरुषमा कोरोना पोजेटिभ भेटिएपछि परिक्षण बढाइँदा थप १५ जना संक्रमित भेटिएका थिए । सम्वाद समूह बाँकेले यसअघि सरकारी निकाय, स्थानीय सरकार प्रमुख, राजनीतिक दल लगायत सरोकार पक्षसँग पनि आवश्यक सम्वाद गरिसकेको छ ।

प्रकाशित मिति: सोमबार, वैशाख २२, २०७७ १७:४०