नेपालगन्जमा संक्रमित क्षेत्र वरपरबाट स्वाब संकलन गरिँदै

समाचार

गृहपृष्ठ
समाचार
नेपालगन्जमा संक्रमित क्षेत्र वरपरबाट स्वाब संकलन गरिँदै

नेपालगन्जमा संक्रमित क्षेत्र वरपरबाट स्वाब संकलन गरिँदै

बुधबार, वैशाख २४, २०७७ बागेश्वरी पोस्ट

नेपालगन्ज । नेपालगन्जमा २३ जना कोरोना संक्रमित फेला परेपछि कन्ट्याक्ट ट्रेसिङका आधारमा स्वाब संकलन सुरु गरिएको छ । हिजो साँझ नेपालगन्ज उपमहानगरपालिका वडा नम्बर ८ स्थित भैरव टोल, रानी तलाउ तरकारी पसल, नाउ टोल, पन्डन मोहला र टांगा स्टेशनबाट स्थानीय बासिन्दाको स्वाब संकलनको काम शुरु गरिएको थियो ।

संक्रमित व्यक्तिको सम्पर्कमा आएका थप ७१ जनाको पहिचान गरी हिजो साँझ ५६ जनाको स्वाबको नमुना संकलन गरिएको जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिनुभयो । आज पनि त्यस क्षेत्रबाट स्वाब संकलनको काम भइरहेको श्रेष्ठले बताउनुभयो । नेपालगन्ज ७ डिएसपी रोडका ६० वर्षीय पुरुषमा शुक्रबार पहिलोपटक कोरोना देखिएपछि उनको सम्पर्कमा आएका ९४ जनाको स्वाब लिएर परिक्षण गर्दा २२ जनामा संक्रमण देखिएको थियो । हिजोदेखि फेरि २२ जनाको सम्पर्कमा आएका ब्यक्तिहरुको पहिचान गरेर स्वाब संकलन थालिएको हो ।

संक्रमितहरु पान पसलदेखि रानीतलाउको सब्जीमण्डी लगायत त्रिभुवन चोक क्षेत्रमा पनि किनमेलका लागि आएको पाइएको छ । त्यस्तै बैशाख १८ गते वडा नम्बर ८ मा राहत वितरण हुँदा पनि संक्रमितहरु त्यहाँ पुगेको बुझिएको छ । एउटै टोलमा कोरोना भाइरसको संक्रमण फैलिएपछि नेपालगन्जमा स्वास्थ्य मन्त्रालय र विश्व स्वास्थ्य संगठनबाट विज्ञहरु आएर अध्ययन अनुसन्धान सुरु गरेको पनि फोकल पर्सन श्रेष्ठले बताउनुभयो ।

प्रकाशित मिति: बुधबार, वैशाख २४, २०७७ १६:१२

प्रतिक्रिया दिनुहोस्