भारतसंग जोडिएको बाँकेको सीमा क्षेत्र अनुगमन

समाचार

गृहपृष्ठ
समाचार
भारतसंग जोडिएको बाँकेको सीमा क्षेत्र अनुगमन

भारतसंग जोडिएको बाँकेको सीमा क्षेत्र अनुगमन

सोमबार, वैशाख २९, २०७७ बागेश्वरी पोस्ट

नेपालगञ्ज । भारतीय सीमावर्ती क्षेत्रबाट लुकीछिपी भइरहेको नेपाल प्रवेश रोक्न बाँकेमा निगरानी बढाइएको छ । जिल्ला सुरक्षा समितिले आजदेखि सीमा क्षेत्रको अनुगमन पनि थालेको छ ।

कोरोना भाइरस(कोभिड-१९) को जोखिम रोक्न सीमा नाका शिल भइरहँदा पनि सशस्त्र प्रहरीले नेपालको सिमामा गरेको कार्य उत्कृष्ट भएको हुँदा सुरक्षा समितिले अनुगमन गरेको हो ।

स्थानीय प्रशासनले सशस्त्र प्रहरीले सीमामा कडा निगरानी गरेको समेत बताएको छ ।

आज खजुरा र जानकी गाउँपालिकासंग सीमा जोडिएका विभिन्न क्षेत्रको अनुगमन गरिएको छ । त्यसक्रममा भारतबाट हुन सक्ने अनाधिकृत प्रवेशलाई रोक्न सतर्क हुन सीमामा खटिएका प्रहरीहरुलाई निर्देशन दिइएको छ।

भारतमा कोरोना संक्रमित बढ्दै जान थालेपछि त्यसको असर पनि नेपालका सीमावर्ती जिल्लाहरुमा देखिएपछि बाँके प्रशासनले पनि सीमा क्षेत्रको अनुगमन गर्दै निगरानी अझैं बढाएको प्रमुख जिल्ला अधिकारी कुमार बहादुर खड्काले बताउनुभयो। अनुगमन टोलीमा प्रमुख जिल्ला अधिकारी खड्का, जिल्ला प्रहरी प्रमुख विर बहादुर ओली, सशस्त्र प्रहरी बल बागेश्वरी गणका गणपति सशस्त्र प्रहरी उपरिक्षक दिपक अधिकारी, भैरव प्रसाद गणका गणपति प्रमुख सेनानी नकुल थापा लगायत हुनुहुन्थ्यो । पछिल्लो समय सीमा क्षेत्रमा बाक्लो मात्रामा सशस्त्र प्रहरी परिचालन गरिएको छ । करिब ५ सय मिटरको दुरीमा रहने गरी सशस्त्र प्रहरी तैनाथ गरिएको छ ।

नेपालगञ्जमा २४ जना संक्रमित भेटिएपछि उच्च सतर्कता अपनाउँदै सीमा नाकामा विशेष निगरानी गरिरहेको प्रमुख जिल्ला अधिकारी खड्काले बताउनुभयो । भारतबाट आएका व्यक्तिहरुमै कोरोनाको संक्रमण देखिन थालेपछि सीमावर्ती क्षेत्रमा सतर्कता बढाइएको हो ।