भारतीय सेना प्रमुखले आफ्नो अत्यन्तै आपत्तिजनक अभिव्यक्ति सच्याउनुपर्छः प्रवक्ता श्रेष्ठ

राजनीति

गृहपृष्ठ
राजनीति
भारतीय सेना प्रमुखले आफ्नो अत्यन्तै आपत्तिजनक अभिव्यक्ति सच्याउनुपर्छः प्रवक्ता श्रेष्ठ

भारतीय सेना प्रमुखले आफ्नो अत्यन्तै आपत्तिजनक अभिव्यक्ति सच्याउनुपर्छः प्रवक्ता श्रेष्ठ

शनिबार, जेठ ३, २०७७ बागेश्वरी पोस्ट

काठमाडौं । सत्तारुढ नेकपाका सचिवालय सदस्य तथा प्रवक्ता नारायणकाजी श्रेष्ठले भारतीय सेना प्रमुख जनरल मनोज नरवानेले आफ्नो भनाई सच्याउनुपर्ने बताएका छन् ।

भारतीय सेना प्रमुख जनरल मनोज नरवानेले लिपुलेक हुँदै कैलाश मानसरोवर जाने सडक निर्माणका सम्बन्धमा दिएको अभिव्यक्ति सच्याउनुपर्ने प्रवक्ता श्रेष्ठले बताएका हुन् । ‘लिम्पियाधुरा, लिपुलेक र कालापानी क्षेत्र र भारतले बनाएको धार्चुला-लिपलेक रोडबारे नेपालको अडानबारे भारतीय सेना प्रमुखको भनाई अत्यन्तै आपत्तिजनक छ,’ उनले शनिबार एक ट्वीट सन्देशमा लेखेका छन्, ‘नेपाल सधैं एक स्वतन्त्र र सार्वभौमसत्ता सम्पन्न देश हो । उनले आफ्नो भनाई सच्याउनुपर्छ ।’

उक्त सडक निर्माणका सम्बन्धमा भारतीय सेना प्रमुखबाट आएको पछिल्लो अभिव्यक्तिका सम्बन्धमा राखिएको जिज्ञासामा नेपाली सेनाका प्रवक्ता विज्ञानदेव पाण्डेले आवश्यकताअनुरुप नेपाली सेनाले प्रष्ट र जिम्मेवार ढङ्गबाट विधिसम्मत तथा उपयुक्त मञ्चमा आफ्नो धारणा व्यक्त गर्ने जानकारी दिएका हुन् ।

भारतीय सेना प्रमुख नरवानेले एक कार्यक्रममा मानसरोवर जाने वास्तविक नियन्त्रित रेखा (एलएसी)लाई लिपुलेक हुँदै गएको उक्त सडकमा कुनै विरोधाभाष नभएको अभिव्यक्ति दिएपछि नेपाली सेनाको उक्त प्रतिक्रिया आएको हो । भारतले नेपालको लिपुलेक, कालापानी र लिम्पियाधुरा क्षेत्र अतिक्रमण गरी सडक निर्माण गरेको विषयमा नेपाल सरकारले यस विषयमा आपत्ति जनाउँदै प्रतिक्रिया दिइसकेको छ ।

यसअघि भारतले नेपालको उक्त क्षेत्रलाई आफ्नो राजनीतिक नक्सामा समावेश गरेकामा नेपाल सरकारसहित सम्पूर्ण राजनीतिक दलले उक्त नक्सा सच्याउन भारतीय सरकारको गम्भीर ध्यानाकर्षण गराएका थिए । sajhapost

प्रकाशित मिति: शनिबार, जेठ ३, २०७७ १५:३४

प्रतिक्रिया दिनुहोस्