बाँकेको नरैनापुर क्वारेन्टाइनका युवकको मृत्यु कोरानाबाटै भएको पुष्टि

समाचार

गृहपृष्ठ
समाचार
बाँकेको नरैनापुर क्वारेन्टाइनका युवकको मृत्यु कोरानाबाटै भएको पुष्टि

बाँकेको नरैनापुर क्वारेन्टाइनका युवकको मृत्यु कोरानाबाटै भएको पुष्टि

आइतबार, जेठ ४, २०७७ बागेश्वरी पोस्ट

नेपालगञ्ज । बाँकेको नरैनापुर गाउँपालिकाको एक क्वारेन्टाइनमा बसेका २५ बर्षीय युवकको मृत्यु कोरानाकै कारण भएको पुष्टि भएको छ।

यो संगै नेपालमा कोरोनाबाट मृत्यु हुनेको संख्या दुई पुगेको छ । हिजो मात्रै सिन्धुपाल्चोककी २९ बर्षीय सुत्केरी महिलाको कोरोनाबाट मृत्यु भएको थियो । स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रबक्ता डा.विकास देवकोटाले ती युवकको मृत्यु कोरोनाबाटै भएको बताउनुभयो ।

भेरी अस्पतालमा गरिएको पिसिआर परिक्षणमा रिपोर्ट पोजिटिभ देखिएपछि उनको मृत्यु कोरोनाबाट भएको पुष्टि भएको हो । बैशाख ३० गते भारतको मुम्बईबाट आएर वडा नम्बर ५ भगवानपुरस्थित दिपेन्द्र प्राविमा बनाइएको क्वारेन्टाइनमा बसेका वडा नम्बर ५ नयाँ बस्तीका ती युवकको आज विहान पौने ७ बजेतिर मृत्यु भएको थियो ।

राति एक्कासी ज्वरो आएको र झाडापखाला तथा उल्टी गरेका उनको विहान मृत्यु भएको मन्त्रालयले जनाएको छ । उनीसहित त्यस क्वारेन्टाइनमा बसेका ३९ जना र अन्य तीन क्वारेन्टाइनका गरी २ सय ६३ जनाको हिजो स्वाब संकलन गरेर पिसिआर परिक्षणका लागि भेरी अस्पताल नेपालगञ्ज ल्याइएको थियो ।

यसअघि भारतबाट आएर क्वारेन्टाइनमा बसेका ४५ जनाको बैशाख ३१ गते स्वाब परिक्षण गरिएकोमा ८ जनामा कोरोना देखिएको थियो । उनीहरुको दाङको बेलझुण्डीस्थित कोरोना विशेष अस्पतालमा उपचार भइरहेको छ ।

प्रकाशित मिति: आइतबार, जेठ ४, २०७७ १६:३७