नरैनापुरका कोरोना संक्रमितलाई अन्ततः नेपालगञ्जतिरै ल्याइने

समाचार

गृहपृष्ठ
समाचार
नरैनापुरका कोरोना संक्रमितलाई अन्ततः नेपालगञ्जतिरै ल्याइने

नरैनापुरका कोरोना संक्रमितलाई अन्ततः नेपालगञ्जतिरै ल्याइने

मंगलबार, जेठ ६, २०७७ बागेश्वरी पोस्ट

नेपालगञ्ज । बाँकेको नरैनापुर गाउँपालिकाका कोरोना संक्रमितहरुलाई अन्ततः नेपालगञ्ज नै ल्याइने भएको छ ।

हिजो बसेको जिल्ला सुरक्षा समितिको बैठकले नरैनापुरकै वडा नम्बर २ मा रहेको प्राथमिक स्वास्थ्य केन्द्र लक्ष्मणपुरलाई नै आइसोलेसन अस्पताल बनाउने निर्णय गरेपनि त्यस ठाउँमा न्यूनतम् पूर्वाधार पनि नभएको भन्दै आलोचना भएपछि निर्णय फेरिएको हो ।

बत्ती नै नभएको ठाउँमा आवश्यक स्रोत साधनको अभावमा कोरोना संक्रमितलाई राख्दा जटिलता उत्पन्न हुन सक्ने भन्दै निर्णय सच्याउन दबाब परेपछि स्थानीय प्रशासनले नेपालगञ्जमै ल्याउने गृहकार्य थालेको छ । ‘त्यता अलि पूर्वाधार नभएकाले समस्या हुन्छ भन्ने भयो, संक्रमित पनि धेरै संख्यामा भए, अब उनीहरुलाई नेपालगञ्जमै ल्याएर राख्ने कुरा भएको छ, कहाँ राख्ने भन्ने निर्णय गर्न हामी अहिले बैठकमै छौं,’ सहायक प्रमुख जिल्ला अधिकारी दिर्घराज उपाध्यायले भन्नुभयो । ‘संक्रमितहरुलाई आइसोलेट गरेर राखिएको छ, यहाँ निर्णय हुनासाथ उनीहरुको व्यवस्थापन हुन्छ,’ उपाध्यायले बताउनुभयो ।

गाउँपालिकाका अध्यक्ष इस्तियाक अहमद शाहले हिजो नै निर्णय सच्याउन आग्रह गर्दै स्रोत साधन र आवश्यक पूर्वाधार नभएको ठाउँमा संक्रमितलाई राख्दा जोखिम बढ्ने भन्दै अन्यत्र सुविधा भएको ठाउँमा व्यवस्थापन गर्न भन्नुभएको थियो ।

नरैनापुरमा हिजो मात्रै थप ५९ जनामा कोरोना देखिएको छ । यसअघि संक्रमित ८ जनालाई भने दाङको बेलझुण्डीस्थित कोरोना विशेष अस्पतालमा राखिएको छ ।

नरैनापुरका ६८ संक्रमित मध्ये एक जनाको आइतबार विहान क्वारेन्टाइनमै मृत्यु भएको थियो । त्यहाँ अहिले १३ वटा क्वारेन्टाइनमा ८ सय १४ जना रहेको स्वास्थ्य शाखा उपप्रमुख नागेन्द्र कुमार शाहले बताउनुभयो ।

प्रकाशित मिति: मंगलबार, जेठ ६, २०७७ ११:१७

प्रतिक्रिया दिनुहोस्