बाँकेका कोरोना संक्रमितहरुको चार ठाउँमा व्यवस्थापन

समाचार

गृहपृष्ठ
समाचार
बाँकेका कोरोना संक्रमितहरुको चार ठाउँमा व्यवस्थापन

बाँकेका कोरोना संक्रमितहरुको चार ठाउँमा व्यवस्थापन

बिहीबार, जेठ ८, २०७७ बागेश्वरी पोस्ट

नेपालगन्ज । बाँकेका कोरोना संक्रमितहरुलाई विभिन्न चार ठाउँमा राखेर उपचार भइरहेको छ । ९९ जना संक्रमित मध्ये १ जनाको मृत्यु भइसकेको छ भने बाँकि ९८ जनाको नेपालगन्ज, खजुरा, कोहलपुर र दाङमा उपचार भइरहेको छ ।

सुशील कोइराला प्रखर क्यान्सर अस्पताल खजुराको आइसोलेसन वार्डमा बर्दियाकी एक बालिकासहित २८ जना, लायन्स डेण्टल अस्पताल नेपालगन्जमा २२, कोहलपुर पिपिरीस्थित कृषि विकास बैंकको तालिम केन्द्र भवनमा ४१ र दाङको बेलझुण्डीस्थित कोरोना विशेष अस्पतालमा ८ जनाको उपचार भइरहेको जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले बताउनुभयो ।

बाँकेमा हालसम्म २ हजार ८१ जनाको स्वाब संकलन गरिएकोमा ९९ जनामा संक्रमण देखिएको छ । ५४६ स्वाबको रिपोर्ट आउन भने बाँकि छ । जिल्लामा सबैभन्दा बढी कोरोना संक्रमित भेटिएको नरैनापुर गाउँपालिकाबाट अहिलेसम्म ७ सय ३ स्वाब संकलन गरिएको छ ।

भेरी अस्पतालमा पिसिआर परिक्षणको चाप बढेपछि हिजो नरैनापुरबाट संकलित २ सय २३ स्याम्पल दाङको घोराहीस्थित राप्ती स्वास्थ्य विज्ञान प्रतिष्ठानमा पठाइएको कोरोना फोकल पर्सन श्रेष्ठले जानकारी दिनुभयो । उहाँका अनुसार हाल जिल्लाका विभिन्न ४४ वटा क्वारेन्टाइनमा १ हजार २ सय २१ जना छन् । सबैभन्दा बढी नरैनापुरमा ६ सय ४५ जना छन् ।

प्रकाशित मिति: बिहीबार, जेठ ८, २०७७ १०:४०

प्रतिक्रिया दिनुहोस्