बाँकेको नरैनापुरबाट भागेका कोरोना संक्रमितलाई प्रहरीले नियन्त्रणमा लियो

समाचार

गृहपृष्ठ
समाचार
बाँकेको नरैनापुरबाट भागेका कोरोना संक्रमितलाई प्रहरीले नियन्त्रणमा लियो

बाँकेको नरैनापुरबाट भागेका कोरोना संक्रमितलाई प्रहरीले नियन्त्रणमा लियो

शनिबार, जेठ १०, २०७७ बागेश्वरी पोस्ट

फाइल फोटो

नेपालगञ्ज। बाँकेको नरैनापुरस्थित क्वारेन्टाइनबाट भागेका कोरोना संक्रमित एक जनालाई प्रहरीले नियन्त्रणमा लिएको छ ।

कोरोना संक्रमितलाई आइसोलेसनमा ल्याउन राति त्यसतर्फ गएको एम्बुलेन्सलाई स्थानीयले घेराउ गरेर संक्रमितलाई नेपालगञ्ज ल्याउन दिएका थिएनन् ।

विहान ३ बजे मात्र निकै लामो रस्साकस्सी बीच प्रहरीले १२ जनालाई एम्बुलेन्समा राखेर ल्याएको थियो । उनीहरुलाई लायन्स डेण्टल अस्पतालमा राखिएको छ । हिजो संक्रमण पुष्टि भएका १३ जना मध्ये एक जनालाई प्रहरीले फेला पार्न सकेको थिएन ।

व्यापक खोजतलासपछि आज विहान मात्र भेटिएका उनलाई अहिले नेपालगञ्जतर्फ ल्याइँदै गरेको बाँकेका प्रहरी प्रबक्ता प्रहरी नायब उपरिक्षक शिव बहादुर सिंहले बताउनुभयो । स्थानीयले एम्बुलेन्स घेराउ गरेर क्वारेन्टाइनबाटै संक्रमितलाई भगाएका थिए । ती मध्ये १२ जनालाई नियन्त्रणमा लिएर नेपालगञ्ज ल्याइए पनि एक जना भागेकालाई पक्राउ गर्न सकिएको थिएन ।

सीमाबाट भारततर्फ भाग्दै गरेका उनलाई विहान नियन्त्रणमा लिइएको सिंहले जानकारी दिनुभयो । यसअघि पनि वडा नम्बर २ लक्ष्मणपुरस्थित आदर्श मावि क्वारेन्टाइनका १२ जना संक्रमितलाई नेपालगञ्ज ल्याउने क्रममा स्थानीयले अवरोध गरेका थिए । विभिन्न अफबाह फैलाउँदै स्थानीय केही नेता एवम् अगुवाको उक्साहटमा स्थानीयलाई आन्दोलित बनाइएको थियो । त्यति बेला पनि संक्रमितलाई नेपालगञ्ज ल्याउन हम्मेहम्मे परेको थियो ।

नरैनापुरको वडा नम्बर ३ शंकरनगर कोटियास्थित नेरा प्रावि क्वारेन्टाइनका १२ जना र वडा नम्बर ४ नेरा प्रावि परशरामपुर्वा क्वारेन्टाइनका १ जनालाई हिजो संक्रमण पुष्टि भएको थियो । आइसोलेसनमा ल्याउनुपर्नेहरुलाई ल्याउन नदिन विभिन्न हर्कत देखाउँदै अवरोध पुर्याउने काममा संलग्नलाई तत्काल कारवाही गर्नुपर्ने माग चर्कोरुपमा उठेको छ ।

प्रकाशित मिति: शनिबार, जेठ १०, २०७७ ०७:५२