बाँकेमा प्रजिअ कुरुम्बाङ आए लगत्तै कडाई,निषेधाज्ञा जारी

समाचार

गृहपृष्ठ
समाचार
बाँकेमा प्रजिअ कुरुम्बाङ आए लगत्तै कडाई,निषेधाज्ञा जारी

बाँकेमा प्रजिअ कुरुम्बाङ आए लगत्तै कडाई,निषेधाज्ञा जारी

बुधबार, जेठ १४, २०७७ बागेश्वरी पोस्ट

जिल्ला प्रशासन कार्यालय, बाँके

नेपालगन्ज । आजदेखि बाँकेको प्रमुख जिल्ला अधिकारीको जिम्मेवारी सम्हालेका प्रमुख जिल्ला अधिकारी राम बहादुर कुरुम्बाङले बाँकेमा कडाईको आदेश दिनुभएको छ।

लकडाउन भद्रगोल नेपालगन्ज अब भने सुध्रिने पक्कै भएको छ। बाँकेमा आज राति १० बजेदेखि निषेधाज्ञा जारी गरिएको छ । अर्को आदेश नहुँदासम्म जिल्लाभर निषेधाज्ञा जारी रहने बाँकेका प्रमुख जिल्ला अधिकारी राम बहादुर कुरुम्बाङले बताउनुभयो ।

बाँकेमा हालसम्म १ सय ७० जनामा कोरोना पुष्टि भएको र १ जना संक्रमितको मृत्यु समेत भइसकेकाले सजकता अपनाउन, संक्रमणको बिस्तारलाई रोक्न तथा सचेतनामूलक र प्रवर्द्धनात्मक कार्य गर्न जरुरी रहेकाले अत्यावश्यक बाहेक सबै सेवा र स्थलमा निषेधाज्ञा जारी गरिएको कुरुम्बाङले बताउनुभयो ।

नेपाल राजपत्रमा तोकिएका अत्यावश्यक सेवाहरु जस्तै-भोजनालय, औषधि पसल, खाद्यान्न, फलफूल तथा तरकारी, अस्पताल तथा स्वास्थ्य केन्द्र संचालन सम्बन्धि सेवा, मालसामान ओसारपसार गर्ने तथा निर्माण कार्यमा प्रयोग हुने ढुवानीका यातायात, सरकारी छापाखाना, संचार सेवा, बैंकिङ सेवा, आन्तरिक सुरक्षा कार्य, खानेपानी संचालन तथा वितरण, पेट्रोलियम पदार्थको ढुवानी, भण्डारण र वितरण, फोहोरमैला संकलन तथा ढुवानी, कृषिजन्य कार्य तथा कृषि तथा पशुपंक्षीजन्य उत्पादन, ढुवानीमा प्रयोग हुने साधन, वर्कशप बाहेकमा निषेधाज्ञा जारी गरिएको छ। आदेशको उल्लंघन गर्नेलाई कानुन बमोजिम कारवाही गरिने जिल्ला प्रशासन कार्यालय बाँकेद्वारा आज जारी सूचनामा उल्लेख छ ।