फिल्डमै खटिँदै सिडिओ- "लकडाउन प्रभावकारी बनाउन थप कडाई गर्नुपर्ने देखियो"

समाचार

गृहपृष्ठ
समाचार
फिल्डमै खटिँदै सिडिओ- "लकडाउन प्रभावकारी बनाउन थप कडाई गर्नुपर्ने देखियो"

फिल्डमै खटिँदै सिडिओ- "लकडाउन प्रभावकारी बनाउन थप कडाई गर्नुपर्ने देखियो"

आइतबार, जेठ १८, २०७७ बागेश्वरी पोस्ट

नेपालगन्ज । बाँकेका प्रमुख जिल्ला अधिकारी राम बहादुर कुरुम्बाङले लकडाउनलाई प्रभावकारी बनाउन अझैं कडाई गर्नुपर्ने अवस्था देखिएको बताउनुभएको छ ।

लकडाउनको अवस्था बुझ्न आज आफैं फिल्डमै खटिएर अनुगमन गर्नुभएका प्रमुख जिल्ला अधिकारी कुरुम्बाङले लकडाउनको परिभाषा अनुसार त्यसको पालना नगरिएको पाइएकाले थप कडाई गर्नुपर्ने आवश्यकता देखिएको बताउनुभयो । भोलिदेखि लकडाउनलाई प्रभावकारी बनाउन अझ कडाई गरिने कुरुम्बाङले बताउनुभयो ।

आज आफैं सडकमा पुगेर लकडाउनको अवस्था बुझ्नुका साथै ओहोरदोहोर गरिरहेका मानिसहरुसंग स्वयंले सोधपुछ गर्नुभएको छ । '८० प्रतिशत मानिसहरु सामान्य काममा निस्केको देखियो, २० प्रतिशत जति मात्रै अत्यावश्यक काममा निस्केको पाएँ,' बागेश्वरी पोष्टसंग कुराकानी गर्दै सिडिओ कुरुम्बाङले भन्नुभयो, 'लकडाउनलाई प्रभावकारी बनाउन अब भोलिदेखि अझैं कडाई गर्छौ ।

जिल्ला प्रशासन कार्यालयमा हाजिर भएदेखि नै दिनहुँ फिल्डमै खटिएर लकडाउनलाई प्रभावकारी बनाउन र कोभिड १९ रोकथामका लागि उहाँ जुट्नुभएको छ । बाँके आएको भोलिपल्टैदेखि उहाँ जिल्लाको समग्र अवस्था बुझ्न अनुगमनमा निस्कनुभएको छ । स्थानीय तहका जनप्रतिनिधिलाई भेटेर जानकारी लिँदै आउनुभएको छ । त्यहाँ रहेका क्वारेन्टाइन, आइसोलेसन सेन्टर, कोभिड १९ विरुद्ध लड्न सम्वन्धित पालिकाले अख्तियार गरिरहेको नीति लगायत समग्र अवस्थाको बारेमा जानकारी लिइरहनुभएको छ ।

उहाँ नरैनापुर, राप्तीसोनारी, डुडुवा, कोहलपुर, नेपालगञ्ज, खजुरा र जानकीमा जिल्लाका सुरक्षा निकायका प्रमुखसहित पुग्नुभएको छ ।