राप्तीसोनारी गाउँपालिकाका सबै कर्मचारीलाई हाजिर हुन निर्देशन जारी

समाचार

गृहपृष्ठ
समाचार
राप्तीसोनारी गाउँपालिकाका सबै कर्मचारीलाई हाजिर हुन निर्देशन जारी

राप्तीसोनारी गाउँपालिकाका सबै कर्मचारीलाई हाजिर हुन निर्देशन जारी

शनिबार, जेठ २४, २०७७ बागेश्वरी पोस्ट

बाँके(राप्तीसोनारी)। राप्तीसोनारी गाउँपालिकाले सबै कर्मचारीलाई भोली सम्ममा अनिवार्य कार्यालयमा हाजिर हुन निर्देशन गरेको छ।

गाउँपालिकामा दरबन्दी भएर पनि कतिपय कर्मचारी नियमित रुपमा हाजिर नभएपछि कर्मचारी अभावको समस्या बल्झिएको हो । हाल कोभिड १९ कारण दरबन्दी भई कतिपय कर्मचारी नियमित हाजिर नभएको गाउँपालिकाका प्रमुख प्रशासकीय अधिकृत दलबहादुर बस्नेतले जानकारी दिनुभयो ।

कर्मचारी हाजिर नहुँदा आर्थिक वर्षको अन्त्य हुनै लाग्दा कतिपय कामहरु प्रभावित हुन पुगेको प्रमुख प्रशासकीय अधिकृत बस्नेतले बताउनु भयो । गाउँपालिका कार्यालयले कर्मचारीका लागि एक सूचना नै प्रकाशित गरेर जेठ २५ गतेभित्र कार्यालयमा उपस्थित हुन निर्देशन दिएको छ ।

गाउँपालिकाका योजना शाखा प्रमुख बालानन्द पौडेलले हस्ताक्षर गरेको सूचनामा भनिएको छ, 'आर्थिक वर्षको अन्त्य हुनै लागेको सन्दर्भमा चालु आर्थिक वर्षका कतिपय कार्यक्रमहरु तत्काल सम्पन्न गर्नुपर्ने भएको र आगामी आर्थिक वर्ष २०७७/७८ का योजना तथा कार्यक्रमहरु समेत समयमै तयार गर्नुपर्ने भएकोले यस कार्यालय र मातहत निकायका सबै कर्मचारीहरु २०७७/२/२५ गते देखी कार्यालयमा अनिवार्य रुपमा हाजिर भई नियमित कामकाज गर्न हुन आदेशानुसार जानकारी गराइन्छ ।

अन्यथा प्रचलित कानुन बमोजिम कारवाही भईजाने ब्यहोरा समेत अनुरोध छ ।' राप्तीसोनारी गाउँपालिकाका अध्यक्ष लाहुराम थारुले कर्मचारी अभावले गर्दा गाउँपालिकाको विकास निर्माणका साथै सेवाग्राहीको काम काज गर्न समस्या हुदै आएको बताउनु भयो ।

संघिय सरकारले सुरु देखी नै गाउँपालिकालाई कर्मचारी नदिएको उहाँको गुनासो छ । 'संघिय सरकारले न आफुले कर्मचारी पठाउँछ, न त गाउँपालिकालाई कर्मचारी भर्ना गर्न दिन्छ,' उहाँले भन्नुभयो ।

प्रकाशित मिति: शनिबार, जेठ २४, २०७७ २१:१६

प्रतिक्रिया दिनुहोस्