कोरोनाबाट मृत्यु भएका युवकका परिवारलाई नरैनापुर गाउँपालिकाद्वारा ५० हजार प्रदान

समाचार

गृहपृष्ठ
समाचार
कोरोनाबाट मृत्यु भएका युवकका परिवारलाई नरैनापुर गाउँपालिकाद्वारा ५० हजार प्रदान

कोरोनाबाट मृत्यु भएका युवकका परिवारलाई नरैनापुर गाउँपालिकाद्वारा ५० हजार प्रदान

घर बनाउन ३ लाख दिइने, अध्यक्षको व्यक्तिगत ५० हजार सहयोग

शुक्रबार, जेठ ३०, २०७७ बागेश्वरी पोस्ट

नरैनापुर (बाँके) । कोरोनाबाट मृत्यु भएका युवकको परिवारलाई नरैनापुर गाउँपालिकाले ५० हजार रुपैयाँ प्रदान गरेको छ । अध्यक्ष इस्तियाक अहमद शाह आज मृतक युवकको घर वडा नम्बर ५ नयाँ बस्ती पुगेर परिवारलाई क्रिया खर्च स्वरुप ५० हजार रुपैयाँको चेक प्रदान गर्नुभएको हो ।

मृतक युवकका बुवा, आमा र श्रीमतीलाई उहाँले चेक हस्तान्तगरण गर्नुभएको हो । "अहिलेलाई क्रिया खर्च स्वरुप ५० हजार दिएका हौं, अब मृतकको परिवारलाई घर बनाउन गाउँपालिकाले ३ लाख रुपैयाँ दिन्छ," अध्यक्ष शाहले भन्नुभयो-"बालबच्चाको लागि मैले पनि व्यक्तिगत ५० हजार रुपैयाँ दिन्छु ।" पीडित परिवारका लागि गाउँपालिकाले सक्दो सहयोग गर्ने अध्यक्ष शाहले बताउनुभयो ।

"यो नराम्रो घटनाले हामी सबैको मन रुवाएको छ, यो दुःखको घडीमा मनलाई सम्हाल्नुस्, म हरेक पल तपाईंहरुसंगै छु," अध्यक्ष शाहले पीडित परिवारलाई सान्त्वना दिँदै भन्नुभयो-"अब यी दुई बालबच्चाको भविष्य राम्रो बनाउन लाग्नुपर्छ, त्यसका लागि म हरपल सहयोग गर्न तत्पर छु ।" अध्यक्ष शाहले खाद्यान्न, तेल, नुन, दाल, झुल लगायतको राहत सामग्री पनि मृतक युवकको परिवारलाई प्रदान गर्नुभएको थियो ।

त्यस अवसरमा वडा नम्बर २ का अध्यक्ष मसुद अहमद शाह, गाउँपालिकाका योजना शाखा प्रमुख विजय यादव, प्रशासन प्रमुख भरत महतो, सूचना अधिकारी लक्ष्मीकान्त मिश्र लगायत हुनुहुन्थ्यो ।

गत जेठ ४ गते क्वारेन्टाइनमै बसेका बेला वडा नम्बर ५ नयाँ बस्तीका २५ बर्षीय युवकको मृत्यु भएको थियो । मृत्युपछि उनमा कोरोना पुष्टि भएको हो । भारतको मुम्बइबाट आएका उनी भगवानपुरको दिपेन्द्र प्रावि क्वारेन्टाइनमा थिए ।