भारतीय नागरिकलाई दाङबाट यसरी दिलाइयो नेपाली नागरिकता

समाचार

गृहपृष्ठ
समाचार
भारतीय नागरिकलाई दाङबाट यसरी दिलाइयो नेपाली नागरिकता

भारतीय नागरिकलाई दाङबाट यसरी दिलाइयो नेपाली नागरिकता

शनिबार, असार १३, २०७७ बागेश्वरी पोस्ट

दिलाइएको नेपाली नागरिकता

दाङ । एक जना भारतीय नागरिकले झूठो विवरण पेश गरी दाङ जिल्लाबाट नेपाली नागरिकता लिएको खुलेको छ । भारतको बलरामपुर जिल्लाका विशाल कुमारले २०७५ मंसिर २५ गते जिल्ला प्रशासन कार्यालय दाङबाट नेपाली नागरिकता लिएका हुन् ।

उनले ‘मितबहादुर दमाई’ को नामबाट नागरिकता लिएका छन् । नेपाली नागरिकतामा उनको बुवाको नाम हिरालाल दमाई र ठेगाना दाङको बंगलाचुली गाउँपालिका वडा नं। ३ उल्लेख छ । उनको नागरिकता प्रमाणपत्र नं। ५२–०१–७५–०४०५२ हो । नागरिकतामा प्रशासकीय अधिकृत जनक प्रसाद भण्डारीको हस्ताक्षर छ । हिरालाल दमाई घोराही उपमहानगरपालिका वडा नं ३ बर्गद्दाका वासिन्दा हुन् ।

हिरालालले भारतीय नागरिक विशाललाई ‘मितबहादुर’ बनाएर ऊ आफ्नो छोरो भएको भन्दै दिएको निवेदनको आधारमा घोराही उपमहानगरपालिका वडा नं। ३ ले नागरिकता बनाउन सिफारिस गरिदिएको थियो । सोही सिफारिसको आधारमा जिल्ला प्रशासन कार्यालयले भारतीय नागरिक विशाल कुमारलाई मितबहादुर दमाईको नामबाट नेपाली नागरिकता दिएको हो ।

यसरी दिलाइयो नेपाली नागरिकता

२५ वर्षे विशाल गुप्ता भारतबाट मजदुरी गर्न दाङको घोराही आएका थिए। घोराहीकै सम्झना नेपालीसँग उनले बिहे गरे र एउटा बच्चा पनि जन्मियो । बच्चाको जन्मदर्ता गराउने बेला विशाल भारतीय नागरिक भएकाले समस्या आयो । विशाल भारतीय नागरिक भएकै कारण विवाह दर्ता पनि भएको थिएन ।

त्यसपछि विशालकी श्रीमती सम्झना नेपालीले नाताले मित मामा पर्ने हिरालाल दमाईसँग विशाललाई नेपाली नागरिकता दिलाइदिन अनुरोध गरिन् । त्यसपछि हिरालालले सुरुमा बंगलाचुली–३ बाट बसाइँ सरेर घोराही उपमहानगरपालिका वडा नं। ३ मा बस्दै आएको बसाइँसराइँको निवेदन घोराही उपमहानगरपालिका वडा नं। ३ को कार्यालयमा २०७५ मंसिर २३ गते दर्ता गराए । त्यसको दुई दिनपछि विशाललाई आफ्नो छोरो मितबहादुर भन्दै नागरिकताको सिफारिस बनाएर सोही दिन जिल्ला प्रशासन कार्यालयबाट वंशजको आधारमा नागरिकता दिलाउन सफल भए । अचम्म त के छ भने भारतीय नागरिकलाई विशाललाई घोराही उपमहानगरपालिका वडा नं ३ को सिफारिसमा बंगलाचुली गाउँपालिका वडा नं ३ को ठेगाना राखेर नागरिकता दिलाइएको छ ।

गलत विवरण पेश गरी नेपाली नागरिकता लिएको कुरा डेढ वर्षपछि खुलासा भएपछि प्रहरीले विशाल कुमारलाई पक्राउ गरेर कारबाही प्रक्रिया अघि बढाएको छ । उनलाई जिल्ला अदालतको आदेशमा पुर्पक्षका लागि कारागार चलान गरिएको छ । घोराहीस्थित उनको डेरामा छापा मार्दा प्रहरीले भारतीय विशिष्ट पहिचान प्राधिकरणले दिएको आधार कार्ड बरामद गरेको छ ।

विशाल कुमारको भारतीय परिचय पत्र

साथै झूठो विवरण पेश गरी नेपाली नागरिकता दिलाउन भूमिका खेलेको भन्दै प्रहरीले हिरालाल दमाई, घोराही उपमहानगरपालिका वडा नं ३ का अध्यक्ष माधवप्रसाद चौधरी, वडा सचिव पदमप्रसाद रेग्मी, त्रिपुरा खड्का, लिला अधिकारीविरुद्ध पनि मुद्दा दर्ता गरेको छ । जिल्ला प्रहरी कार्यालय दाङका डिएसपी सुमित खड्काले उनीहरु फरार रहेको र खोजी कार्य जारी रहेको बताएका छन् ।

तर, वडाअध्यक्ष चौधरी बिहीबारको घोराही नगरसभामा उपस्थित थिए । अन्य आरोपीहरु पनि कार्यालयमा नियमित काममा गइरहेका छन् । वडा सचिव रेग्मीले आफूहरु फरार नभएको र अदालतमा उपस्थित हुने बताएका छन् ।

उनीहरुले बंगलाचुलीमा गरिएको जन्मदर्ता ल्याएर व्यक्ति स्वयं उपस्थित भएको र बसाइँ सराइँको कागजसमेत पेश गर्दै हिरालालले आफ्नो छोरा हो भनेपछि त्यही आधारमा नागरिकताका लागि सिफारिस गरिदिएको बताएका छन् ।अनलाइनखबरबाट।

प्रकाशित मिति: शनिबार, असार १३, २०७७ १०:१९