सति प्रथा अन्त्यको स्मरण गर्दै नेपालगन्जमा भवन निर्माण खर्च सार्वजनिक

समाचार

गृहपृष्ठ
समाचार
सति प्रथा अन्त्यको स्मरण गर्दै नेपालगन्जमा भवन निर्माण खर्च सार्वजनिक

सति प्रथा अन्त्यको स्मरण गर्दै नेपालगन्जमा भवन निर्माण खर्च सार्वजनिक

शनिबार, असार २७, २०७७ बागेश्वरी पोस्ट

नेपालगञ्ज । निर्माणाधीन द्वन्दपीडित तथा एकल महिला सञ्जाल बाँकेको छहारी भवन निर्माणस्थलमा सति प्रथा अन्त्य भएको सय वर्षको अवसरमा सरोकारवाला निकायबीच भवन निर्माण लगायतका विषयमा केन्द्रित रहेर कार्यक्रम गरिएको छ ।

सञ्जालको अथक प्रयासपछि नेपालगञ्ज उपमहानगरपालिकाको सहयोगमा प्राप्त नेपालगञ्ज–९ स्थित २ कठ्ठा क्षेत्रफलमा निर्माण भइरहेको ३ तले भवन अन्तर्गत् पहिलो तलाको हालै ढलान गरिएको हो । हामी बाँचेका छौं भन्ने नारासहित स्मरण तथा हार्दिक नमन गरिएको कार्यक्रममा सञ्जालको भवन निर्माण खर्च विवरण पनि सार्वजनिक गरिएको थियो ।

द्वन्दपीडित तथा एकल महिला सञ्जाल बाँकेका सचिव विजया रोकायाले उपमहानगरपालिका र वडाबाट प्राप्त सहयोग १४ लाख रुपैयाँको खर्च विवरण सार्वजनिक गर्नुभएको थियो । सोही कार्यक्रममा सम्पूर्ण खर्च विवरण लेखेर पनि टाँस गरिएको थियो । बाँकेका सहायक प्रमुख जिल्ला अधिकारी दिर्घराज उपाध्यायले छहारी भवन निर्माणले द्वन्दपीडित तथा एकल महिलाको दु:ख विसाउने मात्र नभई न्यायका लागि एकवद्ध हुन पनि सिकाएको बताउनुभयो ।

खजुरा गाउँपालिकाकी उपाध्यक्ष एवं सञ्जालकी पुर्व अध्यक्ष एकमाया विकले सबैको साथ र संघर्षले भवन निर्माण भइरहेकाले यसको संरक्षण र सञ्चालनमा पनि विशेष चासो रहनुपर्ने सुझाव राख्नुभयो । द्वन्दपीडित तथा एकल महिला सञ्जाल संस्थापक अध्यक्ष एवं मानव अधिकारका लागि महिला एकल महिला समूहका केन्द्रिय उपाध्यक्ष शोभा विसीले भवन निर्माण प्रक्रिया र कार्यक्रमबारे प्रकाश पार्नुभएको थियो ।

द्वन्दपीडित तथा एकल महिला सञ्जाल जिल्ला अध्यक्ष जयन्ति केसीको सभापतित्वमा भएको कार्यक्रममा जिल्ला प्रहरी कार्यालय बाँकेका प्रमुख प्रहरी उपरिक्षक ओम बहादर राना, वडा नम्बर ९ का अध्यक्ष विष्णु लामा, वडा नम्बर १४ का अध्यक्ष ओमकारनाथ मिश्रा, राष्ट्रिय मानवअधिकार आयोग नेपालगञ्जका प्रमुख चन्द्रकान्त चापागाई, मानव अधिकारका लागि महिला एकल महिला समूह प्रदेश ५ कोषाध्यक्ष गोमा थापा, नेपालगञ्ज उद्योग वाणिज्य संघकी निवर्तमान उपमहासचिव एवं पूर्णतारा फाउण्डेशनकी संस्थापक तारा रोकाया, संघकी सदस्य मन्दिरा पाण्डे लगायतले बोल्नुभएको थियो ।

सोही अवसरमा भवन निर्माणार्थ वडा नम्बर १८ की द्वन्दपीडित तथा एकल महिला समूह अध्यक्ष अमृता कार्कीले ५१ सय ५१ रुपैयाँ र पूर्णतारा फाउण्डेनकी संस्थापक तारा रोकायाले ५१ सय रुपैयाँ सहयोग गर्ने घोषणा पनि गर्नुभयो । हाललाई एक तले भएपनि क्रमिकरुपमा छहारी भवनमा कार्यालय, मनोविमर्श कक्ष, संग्रहालय, आश्रय कक्ष, प्रशिक्षण कक्ष, भान्सा घर लगायत निर्माण गरिने द्वन्दपीडित तथा एकल महिला सञ्जालकी जिल्ला अध्यक्ष केसीले जानकारी दिनुभयो ।

प्रकाशित मिति: शनिबार, असार २७, २०७७ ११:०२

प्रतिक्रिया दिनुहोस्