खजुरा गाउँपालिकाको सार्वजनिक सुनुवाई सम्पन्न

समाचार

गृहपृष्ठ
समाचार
खजुरा गाउँपालिकाको सार्वजनिक सुनुवाई सम्पन्न

खजुरा गाउँपालिकाको सार्वजनिक सुनुवाई सम्पन्न

सोमबार, असार २९, २०७७ बागेश्वरी पोस्ट

खजुरा । बाँकेको खजुरा गाउँपालिकाले आज चालू आर्थिक वर्षको अन्तिम सार्वजनिक सुनुवाई गरेको छ ।

चालू आर्थिक वर्ष २०७६/०७७ मा पालिकाले सम्पादन गरेका कार्यहरु सार्वजनिक गर्दै जनअनुमोदन गर्न सार्वजनिक सुनुवाईको आयोजना गरिएको हो । सार्वजनिक सुनुवाईमा खजुराबासीले फेरि पनि चासो पूर्वक भाग लिएका छन् ।

खजुरा गाउँपालिकाले प्रवाह गर्ने सेवा सुविधा र त्यसको प्रभावकारिताबारे आयोजित सार्वजनिक सुनुवाईमा भाग लिँदै गाउँपालिकाबाट प्रवाह हुने सेवाबारे खजुराका विभिन्न वडाबाट सहभागीले खुलेर प्रश्न जिज्ञासा राखेका थिए । उनीहरुले सडकमा खाल्डाखुल्डी, कोरोना प्रभावमा राहत, कृषिमा किसान केन्द्रित कार्यक्रम नभएको, कोभिडमा भएको खर्चबारे प्रश्न राखेका थिए ।

खजुरा गाउँपालिकाका अध्यक्ष किष्मतकुमार कक्षपतिले खजुरा गाउँपालिका, विभिन्न विषयगत शाखाले गरेका कार्य प्रगतिको प्रतिवेदन प्रस्तुत गरेका थिए । सो क्रममा प्रमुख कक्षपतिले खजुरा गाउँपालिकाले प्रवाह गर्ने सेवा सुविधा र कार्यप्रगतिबारे गाउँपालिकाको वेभसाइटमा राखिने गरेको जानकारी दिनुभयो । विभिन्न सम्पन्न भएका योजना, कृषि, शिक्षा, स्वास्थ्य, खेलकुद लगायतका क्षेत्रमा भएका प्रगतिबारे प्रतिवेदनमा उल्लेख गरिएको छ ।

८ वटै वडाबाट आएका सहभागीले उठाएको प्रश्नको जवाफ खजुरा गाउँपालिका अध्यक्ष कक्षपति, उपाध्यक्ष एकमाया विक, प्रमुख प्रशासकीय अधिकृत बमबहादुर केसी, वडा अध्यक्षहरु, विषयगत शाखाका प्रमुखहरुले दिएका थिए । चालू आर्थिक वर्षको गाउँपालिकाले गरेका विभिन्न गतिविधि, आगामी योजनाबारे प्रतिवेदन प्रस्तुत गर्दै अध्यक्ष कक्षपतिले विषयगत शाखाहरुले गरिरहेको कार्यप्रगतिका साथै वडाहरुमा भइरहेको विकास निर्माण कोरोनाले प्रभावित भएको बताउनुभयो ।

खजुरामा शिक्षा, स्वास्थ्य, कृषि, खेलकुदको विकासमा गाउँपालिका प्राथमिकताका साथ अगाडि बढिरहेको, विकास निर्माणमा गत आर्थिक वर्षमा १८ किलोमिटर सडक कालोपत्रे गरेकोमा यो वर्ष पनि वडा नं. ५ देखि ८ सम्म १६ किलो मिटर र अन्य वडाहरुमा ३ किलो मिटर सडक कालोपत्रेको चरणमा रहेको बताइयो ।

बहुउद्देशीय सभाहल निर्माण प्रक्रियामा रहेको, शीत भण्डार, औद्योगिक ग्राम, खेलकूद ग्रामको काम पनि अगाडि बढेको जस्ता थुप्रै विकासका काम अगाडि बढेको अध्यक्ष कक्षपतिले प्रस्तुत गरेको प्रतिवेदनमा समेटिएको छ ।

बासले सहजीकरण गरेको सार्वजनिक सुनुवाईमा खजुराका विभिन्न वडाहरुमा गरिएको सर्वेक्षणमा पनि नागरिकले प्राप्त गरेको सेवाबारे राम्रो रहेको औंल्याइएको छ । कार्यक्रमको अन्त्यमा सेवा प्रवाहलाई चुस्त दुरुस्त र जनअपेक्षा अनुकूल बनाउन प्रतिवद्धतामा हस्ताक्षर भएको छ ।

प्रकाशित मिति: सोमबार, असार २९, २०७७ १८:२९

प्रतिक्रिया दिनुहोस्