नेपालगञ्ज १० मा झोला उत्पादन तालिम सम्पन्न

समाचार

गृहपृष्ठ
समाचार
नेपालगञ्ज १० मा झोला उत्पादन तालिम सम्पन्न

नेपालगञ्ज १० मा झोला उत्पादन तालिम सम्पन्न

सोमबार, साउन ५, २०७७ बागेश्वरी पोस्ट

नेपालगञ्ज । नेपालगञ्ज वडा नम्बर १० मा सञ्चालित ६० दिने झोला उत्पादन तालिम समापन गरिएको छ । वडालाई प्लाष्टिक मुक्त गर्नका लागि स्थानीय बेरोजगार महिलाहरुलाई केन्द्रित गरेर गत फागुनमा तालिम सञ्चालन गरिएको हो ।

वडा नम्बर १० वडा समितिको कार्यालयको सहयोगमा समृद्धि सिलाईकटाई प्रशिक्षण केन्द्रद्वारा सञ्चालित तालिम एक महिनापछि लकडाउनका कारण रोकिएकोमा असारमा पुनः शुरु गरिएको थियो । १५ जना सहभागी तालिममा विभिन्न प्रकारका झोला बनाउन सिकाइएको प्रशिक्षक समेत रहनुभएकी समृद्धि सिलाईकटाई प्रशिक्षण केन्द्रका अध्यक्ष कल्पना कुमारी बिकले जानकारी दिनुभयो । प्रशिक्षक बिकका अनुसार प्लाष्टिकको सट्टा घरायसी सरसामान बोक्न सहज हुने झोला उत्पादन गरिएको थियो ।

तालिम समापन समारोहमा वडा नम्बर १० का वडा सदस्य एवं उपमहानगरपालिकाका सुशासन समितिका संयोजक नर बहादुर विष्टले सहभागीहरुलाई प्रमाणपत्र प्रदान गर्दै तालिमले व्यवसायिक आयआर्जनमा मद्दत पुग्ने विश्वास व्यक्त गर्नुभयो । वडा नम्बर १० की वडा सदस्य एवं नेपालगञ्ज उपमहानगरपालिकाका कार्यपालिका सदस्य वसन्ता जोशी, नेपालगञ्ज उपमहानगरपालिकाका कार्यपालिका सदस्य देउमल सुनार, वडा सचिव शान्ति केसी, वडा सहजकर्ता रजनी खनाल लगायतले शुभकामना दिनुभएको थियो ।

दलित औद्योगिक विकास कार्यक्रम नेपाल बाँकेका सचिव छविलाल सुनारद्वारा सञ्चालित समारोहमा तालिममा सहभागी पुष्पा भट्ट, मनिषा गुप्ताले तालिम अनुभवबारे बोल्नुभएको थियो ।

प्रकाशित मिति: सोमबार, साउन ५, २०७७ १०:२६

प्रतिक्रिया दिनुहोस्