त्रिभुवन चोक 'शिल' गर्ने तयारी

समाचार

गृहपृष्ठ
समाचार
त्रिभुवन चोक 'शिल' गर्ने तयारी

त्रिभुवन चोक 'शिल' गर्ने तयारी

४ सय २३ स्वाबको रिपोर्ट कुर्दै प्रशासन

आइतबार, साउन १८, २०७७ बागेश्वरी पोस्ट

जिल्ला प्रशासन कार्यालय, बाँके

नेपालगञ्ज । त्रिभुवन चोक क्षेत्र वरपर 'ट्राभल हिष्ट्री' नभएका समुदायकै मानिसहरुमा कोरोना देखिएपछि नेपालगञ्ज तरंगित बनेको छ । सेवाग्राहीको भीडभाड हुने आन्तरिक राजश्व कार्यालय, यातायात कार्यालय र अदालतमा समेत कोरोना संक्रमण देखिएपछि कोरोनाले समुदायमै डेरा जमाइसकेको निष्कर्ष निकाल्दै जिल्लाभर तीन दिने निषेधाज्ञा जारी गरिएको छ । संक्रमणको विस्तारलाई रोक्न निषेधाज्ञा जारी गरिएको हो ।

त्रिभुवन चोकका एक मिठाई पसलेमा देखिएको संक्रमणपछि उनको कन्ट्याक्टका १६ जनामा कोरोना पुष्टि भएपछि त्रिुभवन चोकलाई 'नयाँ हटस्पट' मानिएको छ । "त्रिभुवन चोकलाई कोरोनाको 'इपिसेन्टर' ठानेर हामीले थप रणनीति बनाउँदैछौं, त्रिभुवन चोकलाई शिल गरेर अघि बढ्ने योजना बनाउँदैछौं," प्रमुख जिल्ला अधिकारी राम बहादुर कुरुम्बाङले भन्नुभयो ।

संक्रमित सम्पर्कका ४ सय २३ स्वाबको रिपोर्ट आउन बाँकि रहेकाले त्यसको परिणाम हेरेर निषेधाज्ञा बढाउने नबढाउने विषयमा थप रणनीति बनाइने प्रमुख जिल्ला अधिकारी कुरुम्बाङले बताउनुभयो । उहाँले निषेधाज्ञाको पूर्ण पालना गर्न आग्रह गर्नुभएको छ । निषेधाज्ञामा अत्याबश्यक सेवा बाहेक सबै निषेध गरिएको कुरुम्बाङले बताउनुभयो ।

बाँकेमा हालसम्म ४ सय ३७ जनामा कोरोना पुष्टि भएको छ । ती मध्ये ३ सय ८७ जना निको भएर घर फर्किएका छन् । दुई जनाको भने मृत्यु भएको छ । अहिले बाहिरी जिल्लाका ९ जना र बाँकेका ४८ जना गरी ५७ जना आइसोलेसनमा छन् । नरैनापुर, डुडुवा, जानकी र बैजनाथमा कोरोना संक्रमण शून्यमा झरेको छ ।

प्रकाशित मिति: आइतबार, साउन १८, २०७७ १२:२०

प्रतिक्रिया दिनुहोस्