नेपालगन्ज गायत्रीनगरका सुकुम्वासीलाई खानाकै समस्या

समाचार

गृहपृष्ठ
समाचार
नेपालगन्ज गायत्रीनगरका सुकुम्वासीलाई खानाकै समस्या

नेपालगन्ज गायत्रीनगरका सुकुम्वासीलाई खानाकै समस्या

शुक्रबार, साउन ३०, २०७७ बागेश्वरी पोस्ट

नेपालगञ्ज । नेपालगञ्ज–२० मनिकापुर गायत्रीनगरमा बसोबासरत सुकुम्वासी/भूमीहिनलाई समस्यामाथि समस्या थपिँदै गएका छन् ।

कोरोनाको बढ्दो संक्रमणका बीच निरन्तरको लकडाउन र बेला बेला गरिएको निषधाज्ञाले मजदुरी गरेर जीवन निर्वाह गर्ने उनीहरुलाई खाना खान समेत समस्या परिरहको छ ।

वर्षौंदेखि सुकुम्बासी/भूमीहिनका नाममा आदर्श माविको जग्गामा बसोवास गरिरहेका ६० परिवारहरुलाई हालै नजिकै नाला किनारमा स्थानान्तरण गरिएपछि व्यवस्थित बस्ने प्रयास जारी रहेको थियो । वडा नम्बर २० वडा समिति कार्यालयको अग्रसरता र सम्वाद समूह बाँकेको सम्वाद सहजीकरणपछि डेढ दशक अघिदेखिको बसोबासको किचलो अन्त्य भएको थियो ।

विद्यालयको अतिक्रमित जग्गा खाली भइसकेको थियो भने अधिकांश परिवारले घर बनाएर अन्यत्र बस्ने चाँजो मिलाइरहेका बेला लकडाउन भएपछि विचल्ली भएको हो । सो क्षेत्रमा कुछबंधियासहित करिव ८५ घरपरिवार रहेका छन् । दिनभर काम गरेर साँझपख जोहो गर्ने अधिकांश परिवार यतिबेला थप आहतमा परेका छन् । अपांग, अशक्त, एकल महिला, वृद्ध, वृद्धाहरु झनै अफ्ठयारोमा परेका छन् । लगातारको बन्दले मजदुरी गर्ने, रिक्सा चलाउने, मिस्त्री, ठेला व्यापार , घुम्ती पसल लगायतका काममा संलग्नहरु पनि मारमा परेका छन् । 'भएको रासनपानी, पैसो सबै सकियो, काम गर्ने बातावरण पनि छैन । के गरेर गुजारा गर्ने हो भन्ने पीर छ'— कृष्ण बहादुर कामीले सामुहिक समस्या सुनाउनुभयो ।

केही समय अघि वडा कार्यालय, विभिन्न सामाजिक संघसंस्थाको खाद्यान्न सहयोगले केही राहात भएपनि अहिले भने थप समस्या दखिएको छ । स्थानीय अगुवा लाल बहादुर परियारले भन्नुभयो— 'खाने कुरा पनि छैन्, काम पनि छैन, समस्यामाथि समस्या थपिएको छ ।' अपांग समेत रहेका परियारको एउटै माग थियो —'कहीं कतैबाट खाद्यान्न सहयोग जुटाई दिनुस् ।'

प्रकाशित मिति: शुक्रबार, साउन ३०, २०७७ १६:०५

प्रतिक्रिया दिनुहोस्