कालापानीबारे प्रधानमन्त्री ओलीको आह्वानमा आज सर्वदलीय बैठक बस्ने

राजनीति

गृहपृष्ठ
राजनीति
कालापानीबारे प्रधानमन्त्री ओलीको आह्वानमा आज सर्वदलीय बैठक बस्ने

कालापानीबारे प्रधानमन्त्री ओलीको आह्वानमा आज सर्वदलीय बैठक बस्ने

शनिबार, कात्तिक २३, २०७६ बागेश्वरी पोस्ट

काठमाडौं । प्रधानमन्त्री केपी ओलीले भारतसँगको सीमाविवादबारे राष्ट्रिय सहमतिसहितको ठोस धारणा तय गर्न शनिबार पूर्वप्रधानमन्त्रीहरूसहितको बैठक आह्वान गरेका छन् । बैठकमा प्रमुख राजनीतिक दलका नेताहरूलाई पनि डाकिएको छ ।

नेपाली भूमि कालापानी क्षेत्र समेट्ने गरी भारतले आफ्नो नयाँ नक्सा सार्वजनिक गरेपछि सरकार राष्ट्रिय धारणा बनाएर अघि बढ्ने तयारीमा लागेको हो । ‘प्रधानमन्त्रीज्यूले शनिबार अपराह्न पूर्वप्रधानमन्त्री, राजनीतिक दलका नेताहरू, विज्ञहरूसहितको परामर्श बैठक आह्वान गर्नुभएको छ,’ प्रधानमन्त्रीका मुख्य सल्लाहकार विष्णु रिमालले भने ।

भारतसँगको सीमाविवादमा प्रमुख प्रतिपक्ष कांग्रेससहित संसद्मा प्रतिनिधित्व गर्ने राजनीतिक दलहरूको एउटै धारणा तय गर्नका लागि प्रधानमन्त्रीले बैठक आह्वान गरेको उनको सचिवालयले जनाएको छ ।

छलफलमा पूर्वप्रधानमन्त्रीहरू पुष्पकमल दाहाल प्रचण्ड, शेरबहादुर देउवा, माधवकुमार नेपाल, झलनाथ खनाल, डा. बाबुराम भट्टराई, लोकेन्द्रबहादुर चन्द, पूर्वपरराष्ट्रमन्त्रीहरूसहितलाई आमन्त्रण गरिएको प्रधानमन्त्रीको सचिवालयले जनाएको छ ।

छलफलमा परराष्ट्रमन्त्री प्रदीप ज्ञवाली, परराष्ट्रविद्, सीमाविद्, विभिन्न राजनीतिक दलका नेताहरू, नापी विभागका महानिर्देशकलगायतलाई पनि डाकिएको छ । नापी विभागले प्रस्तुत गर्ने नक्सा, तथ्य–प्रमाणका आधारमा छलफल गर्ने र सुझाबसहितको निष्कर्षका आधारमा भारतसँग संवाद अघि बढाउने सोचमा प्रधानमन्त्री ओली रहेको स्रोतले जनाएको छ ।

कालापानी भारतीय नक्सामा परेकोप्रति सरकारले परराष्ट्र मन्त्रालयमार्फत आपत्ति जनाइसकेको छ । बिहीबार जारी वक्तव्यमा कालापानी क्षेत्र नेपालकै भूमि भएको र सीमारक्षाका लागि सरकार प्रतिबद्ध रहेको उल्लेख थियो । नेपाली भूमि फिर्ताका लागि तत्काल पहल गर्न प्रमुख प्रतिपक्षी दल कांग्रेससहित राजनीतिक दल, युवा–विद्यार्थी संगठनहरूले दबाब दिइरहेका छन् ।

प्रकाशित मिति: शनिबार, कात्तिक २३, २०७६ ०७:३४