ज्ञानोदय पुस्तकालयले दियो फरक क्षमता भएकालाई राहत

समाचार

गृहपृष्ठ
समाचार
ज्ञानोदय पुस्तकालयले दियो फरक क्षमता भएकालाई राहत

ज्ञानोदय पुस्तकालयले दियो फरक क्षमता भएकालाई राहत

बुधबार, भदौ ३, २०७७ बागेश्वरी पोस्ट

कोहलपुर । बाँकेको कोहलपुर नगर क्षेत्रभित्र रहेका फरक क्षमता र अति विपन्न परिवारलाई ज्ञानोदय सामुदायिक पुस्तकाय तथा श्रोत केन्द्र कोहलपुरले राहत उपलब्ध गराएको छ । नोबेल कोरोना भाइरसका कारण पाँच महिनादेखि बन्दाबन्दी अवस्था कायम रहिरहेको अवस्थामा विशेषगरी दुई छाक भोजनको जोहो गर्न समेत मुस्किल भइरहका परिवारको विवरण संकलन गरेर पुस्तकालयले खाद्यान्न सहितको राहत उपलब्ध गराएको हो । नेपालभर रहेका सामुदायिक पुस्तकालयहरुको मातृ संस्था रिड नेपालको समन्वयमा ज्ञानोदयले नगर क्षेत्रमा रहेका अति न्यून आयसहित फरक क्षमता (अपाङ्गता) रहेका १२ परिवारलाई अपाङ्ग नवजीवन केन्द्र र स्थानीय अगुवाहरुको समन्वयमा राहत स्वरुप खाद्यान्न उपलब्ध गराइएको हो । पुस्तकालयको राहत वितरण कार्य सामाजिक कार्यको उच्चतम् नमूनायोग्य कार्य रहेको कोहलपुर नगरपालिकाका प्रमुख लुट बहादुर रावतले प्रतिक्रिया दिनुभयो । सोमबार पुस्तकालय प्राङ्गणबाट राहत वितरण कार्यको शुभारम्भ गरेका नगर प्रमुख रावतले बन्दाबन्दीको मार सबैले खेपिरहेको अवस्थामा नगर क्षेत्रमा अति विपन्न एवम् न्यून आय र फरक क्षमता भएका परिवारको वास्तविक विवरण संकलन गरेर राहत उपलब्ध गराएकोमा पुस्तकालयलाई धन्यवाद ज्ञापन गर्नुभएको छ । नगर क्षेत्रमा रहेका अति विपन्न तथा न्यून आय भएका परिवारलाई नगरपालिकाले पनि सहयोग गर्ने प्रतिबद्वता नगर प्रमुख रावतले व्यक्त गर्नुभयो । नगर प्रमुख रावतले कार्यक्रम शुभारम्भ गरेपछि पुस्तकालयका पदाधिकारीहरु नगर क्षेत्रका विभिन्न वडाहरुमा लक्षित परिवारको घरमै पुगेर राहत सहितको खाद्यान्न उपलब्ध गराएका छन् । वडा नं. ११ मा ३ जना फरक क्षमता भएका विपन्न परिवार, वडा नं. २ मा दुवै मृगौला निष्कृय भएर समस्याग्रस्त महिला सहित १ जना अति विपन्न परिवार, वडा नं. १० मा अति विपन्न २, फरक क्षमता भएको १ सहित १ जना विपन्न सुत्केरी महिला लगायत वडा नं. ८ र ६ मा गरेर १२ घर परिवारलाई प्रति घरपरिवार २५ के.जी. चामल, अढाई के.जी. दाल, २ के.जी. नुन र २ लिटर तेल सम्बन्धित वडाका जनप्रतिनिधि तथा अगुवाहरुको उपस्थितिमा पुस्तकालयले राहत उपलब्ध गराएको हो । वडा नं. १० मा राहत विवरण कार्यक्रमलाई सम्बोधन गर्दै वडाध्यक्ष निरज चलाउनेले वास्तविक विपन्न एवम् फरक क्षमता भएका परिवारको पहिचान गरेर लक्षित परिवारको घर आँगनमै पुगेर राहत उपलब्ध गराउनु उत्कृष्ट कार्य भएको प्रतिक्रिया दिनुभयो । सामाजिक कार्यमा अग्रणी भूमिका निर्वाह गरिरहेको पुस्तकालयले आगामी दिनमा पनि यस्तै गतिविधिहरु सञ्चालन गर्न अनुरोध गर्नुभएको छ । हिन्दु महिलाहरुको महान पर्व हरितालिका तीजमा नगर क्षेत्रमा कुनै पनि परिवारले विपन्नता भएकै कारण चुलो बल्नबाट बन्चित हुन नपरोस् भनेर पनि तीजको पूर्व सन्ध्यामा राहत वितरण कार्यक्रम गरिएको पुस्तकालयका अध्यक्ष चेतकान्त भट्टराईले बताउनुभयो ।

प्रकाशित मिति: बुधबार, भदौ ३, २०७७ १६:२२

प्रतिक्रिया दिनुहोस्