सभापति देउवाविरुद्ध 'नयाँ स्टेप' चाल्ने तयारीमा पौडेल समूह

समाचार

गृहपृष्ठ
समाचार
सभापति देउवाविरुद्ध 'नयाँ स्टेप' चाल्ने तयारीमा पौडेल समूह

सभापति देउवाविरुद्ध 'नयाँ स्टेप' चाल्ने तयारीमा पौडेल समूह

मंगलबार, भदौ ९, २०७७ बागेश्वरी पोस्ट

फाइल तस्बिर

काठमाण्डौ । नेपाली कांग्रेसका वरिष्ठ नेता रामचन्द्र पौडेल समूहले 'नयाँ स्टेप' चाल्ने तयारी थालेको छ ।

सभापति शेरबहादुर देउवा समूहले पार्टीको १४ औं महाधिवेशन प्रभावित गर्न थालेको भन्दै त्यसलाई रोक्नका लागि नयाँ कदम चाल्ने निष्कर्षमा वरिष्ठ नेता पौडेल समूह पुगेको हो ।

हिजो साँझ भएको पौडेल समूहका केन्द्रिय सदस्यहरुको भर्चुअल बैठकले निष्पक्ष महाधिवेशनको ग्यारेन्टीका लागि नयाँ स्टेप चल्ने निष्कर्ष निकालेको हो ।

बैठकमा सहभागी एक केन्द्रिय सदस्यका अनुसार ११ जिल्लामा अहिलेसम्म समायोजन नसकिएको, अझै दुई नम्बर प्रदेशका कुनै पनि जिल्लामा समायोजनको काम नै नभएको, अवैध रुपमा विभाग गठन गरिएको तर त्यसका बारेका अहिलेसम्म सभापति समूह मौन रहेकाले नयाँ स्टेप चाल्नुपर्ने सुझाव सवै केन्द्रिय सदस्यहरुको थियो । निष्पक्ष महाधिवेशनको ग्यारेन्टीका लागि अनसन बस्ने, धर्ना दिने, हस्ताक्षर अभियान चलाउने लगायतका विकल्पमा भर्चुअल बैठकमा छलफल भएको नेता अर्जुननरसिंह केसीले बताउनुभयो ।

कोरोना महामारी कम भए लगत्तै पार्टी कार्यालयमा धर्ना दिनुपर्ने सुझाव आफुले दिएको केसीले बताउनुभयो । उहाँले भन्नुभयो-'जुन जिल्लामा अन्याय भएको छ, त्यही जिल्ला पार्टी कार्यालय घेराउ गर्न लगाउने, केन्द्रमा केन्द्रिय नेताहरु नै धर्ना र घेराउमा बसेर निष्पक्ष महाधिवेशनको दिशामा जानुपर्छ भन्ने विषयमा छलफल भएको छ।'

बैठकमा वरिष्ठ नेता रामचन्द्र पौडेल, महामन्त्री शशांक कोइराला, नेताहरु प्रकाशमान सिंह, अर्जुननरसिंह केसी, बलबहादुर केसी, शेखर कोइराला, दिलेन्द्र बडू, मिनेन्द्र रिजाल, दीपक गिरी, चन्द्र भण्डारी, , नविन्द्रराज जोशी, धनराज गुरुङ, गुरु घिमिरे, बद्री पाण्डे, जीवन परियार, रत्ना शेरचन, कमला पन्त लगायतको सहभागिता थियो ।

प्रकाशित मिति: मंगलबार, भदौ ९, २०७७ ०७:५५

प्रतिक्रिया दिनुहोस्