सम्वादको प्रभाव-एक हप्ताभित्र आइसोलेसन सञ्चालनको तयारी

समाचार

गृहपृष्ठ
समाचार
सम्वादको प्रभाव-एक हप्ताभित्र आइसोलेसन सञ्चालनको तयारी

सम्वादको प्रभाव-एक हप्ताभित्र आइसोलेसन सञ्चालनको तयारी

शुक्रबार, असोज १६, २०७७ बागेश्वरी पोस्ट

नेपालगञ्ज । भेरी अस्पतालमै थप ७५ बेडसहितको आइसोलेसन सञ्चालन गर्ने तयारी गरिएको छ । बढ्दो कोरोना संक्रमितको सहज र प्रभावकारी उपचारका लागि सम्वाद समूह बाँकेले गत ११ गते सरोकारवालासँग अन्तरसम्वाद गरेपछि भेन्टिलेटरसहितको सुविधायुक्त आइसोलेसन व्यवस्थापन तथा सञ्चालनको प्रक्रिया अघि बढाइएको हो ।

भेरी अस्पतालमा अक्सिजन सुविधासहित ७२ बेडको कोरोना विशेष अस्पताल सञ्चालनमा ल्याइए पनि लक्षणसहितका गम्भीर विरामीहरुको संख्या बढ्दै गएपछि समूहले थप आइसोलेसनको आवश्यकताका सन्दर्भमा सम्वाद सजीकरण मार्फत् सहकार्यको प्रतिवद्धता सिर्जना गरेको हो । स्थानीय तह, स्वास्थ्य सम्वद्ध प्रमुखसहितको जिल्ला कोभिड-१९ संकट व्यवस्थापन केन्द्रको विहिबार बसेको बैठकले भेरी अस्पतालमा थप ७५ बेडको आइसोलेसन सञ्चालन गर्ने निर्णय गरेको छ ।

बाँकेका प्रमुख जिल्ला अधिकारी एवं जिल्ला कोभिड-१९ संकट व्यवस्थापन केन्द्रका प्रमुख राम बहादुर कुरुम्वाङको अध्यक्षतामा बसेको बैठकले एक हप्ताभित्र आवश्यक संरचना तयार गर्ने निर्णय गरेको छ । बैठकमा सहभागी खजुरा गाउँपालिकाका अध्यक्ष किष्मत कुमार कक्षपतिका अनुसार उपभोक्ता समिति मार्फत् एक करोडको बेड, भेन्टिलेटरसहितको आवश्यक संरचना तयार गरिनेछ । आइसोलेसन निर्माणका लागि जिल्ला समन्वय समितिको शिक्षा तथा आकस्मिक कोष र ८ वटै स्थानीय तहबाट एक करोड सहयोग गरिने प्रतिवद्धता पनि व्यक्त गरिएको छ ।

आइसोलेसन सञ्चालनका लागि स्टोर गरिएका सरसामान व्यवस्थापन गर्नेदेखि प्राविधिक तयारी पनि शुरु गरिसकिएको भेरी अस्पतालका कोभिड-१९ कमाण्डर डा. श्याम सुन्दर यादवले जानकारी दिनुभयो । बाँकेमा दैनिक ३० जनामा (औसतमा) कोरोना पोजिटिभ देखिइरहेको स्थितिमा थप संक्रमितलाई राख्न सक्ने अवस्था नभएको भन्दै सम्वद्ध विज्ञले यसअघि नै भेरी अस्पतालमै आइसोलेसन सञ्चालन गरिनुपर्ने सुझाएका थिए ।

प्रकाशित मिति: शुक्रबार, असोज १६, २०७७ १४:३०

प्रतिक्रिया दिनुहोस्