बुटवल–भैरहवा करिडोरलाई वित्तीय राजधानी बनाउने प्रदेश ५ सरकारको निर्णय

समाचार

गृहपृष्ठ
समाचार
बुटवल–भैरहवा करिडोरलाई वित्तीय राजधानी बनाउने प्रदेश ५ सरकारको निर्णय

बुटवल–भैरहवा करिडोरलाई वित्तीय राजधानी बनाउने प्रदेश ५ सरकारको निर्णय

मंगलबार, असोज २०, २०७७ बागेश्वरी पोस्ट

नेपालगञ्ज । प्रदेश ५ सरकारले रुपन्देही, कपिलवस्तु र नवलपरासी जिल्लालाई सांस्कृतिक र पर्यटकीय राजधानी बनाउने निर्णय गरेको छ । आज बिहान बसेको मन्त्रीपरिषद् बैठकले बुद्धजन्मस्थल लुम्बिनी र बुद्धसँग सम्बन्धित क्षेत्र उजागर गर्ने भन्दै यी तीन जिल्ला समेटेर सांस्कृतिक र पर्यटकीय राजधानी बनाउने निर्णय गरेको हो ।

सामाजिक विकास मन्त्री सुदर्शन बरालका अनुसार बैठकले रूपन्देहीको बुटवल–भैरहवा करिडोरलाई वित्तीय राजधानी बनाउने निर्णय पनि गरेको छ । यस्तै कपिलवस्तुको शिवराज नगरपालिकामा सरुवा रोग नियन्त्रणसम्बन्धि अस्पताल बनाउने मन्त्रीपरिषद्को निर्णय छ । यसका लागि वन क्षेत्रको ९ बिघा जग्गा उपलब्ध गराउने निर्णय भएको मन्त्री बरालले जानकारी दिनुभयो ।

रूपन्देहीमा रहेको अस्थायी राजधानी स्थायीरूपमा दाङको देउखुरी लैजाने प्रस्तावले चिढिएका सत्ता पक्षका प्रदेशसभा सदस्यलाई सान्त्वना दिलाउन मन्त्रीपरिषद्ले उक्त निर्णय गरेको हो । यसअघि हिजो भएको नेकपा संसदीय दलको बैठकमा भौतिक पूर्वाधार मन्त्री बैजनाथ चौधरीले उक्त प्रस्ताव पेश गर्नुभएको थियो । चौधरीको प्रस्तावलाई नेकपा संसदीय दलबाट निर्णय गराएर मन्त्रीपरिषद्मा लगिएको थियो ।

मन्त्रीपरिषद्का उक्त निर्णय मुख्यमन्त्री शंकर पोखरेलले प्रदेशसभाबाट सार्वजनिक गर्ने तयारी छ । तर, प्रतिपक्ष कांग्रेसको विरोधले प्रदेशसभा बैठक चल्ने अवस्था नभए पत्रकार सम्मेलन मार्फत् सार्वजनिक गरिने मन्त्री बरालले बताउनुभयो । (कान्तिपुरबाट)

प्रकाशित मिति: मंगलबार, असोज २०, २०७७ ११:०४

प्रतिक्रिया दिनुहोस्