जब निशा बनिन् एक दिनको लागि सम्पादक...

समाचार

गृहपृष्ठ
समाचार
जब निशा बनिन् एक दिनको लागि सम्पादक...

जब निशा बनिन् एक दिनको लागि सम्पादक...

शनिबार, असोज २४, २०७७ बागेश्वरी पोस्ट

एक दिनको लागि सम्पादकको भूमिकामा निशा सुनार

नेपालगञ्ज । निशा सुनार एक दिनको लागि सम्पादकको भूमिका निभाउन पाउँदा खुसी थिइन् । बाँकेको खजुरा गाउँपालिका वडा नम्बर ४ बुद्धपुरकी निशा सम्पादकको कुर्सीमा बसेर समाचार सम्पादन गरिरहँदा 'जिम्मेवारीको गह्रुंगो भारी' बोकेको अनुभूति गर्दै थिइन् । "समाचार लेख्न बल्ल अलि अलि सिक्दैछु, यसमा मेरो चासो पनि विस्तारै बढ्दैछ तर आज यसरी अरुले लेखेको समाचार नै सम्पादन गरेर अपलोड गर्ने ठूलो जिम्मेवारी निभाउन पाउँदा खुसी त छु नै, धेरै कुराहरु पनि सिक्ने मौका पाएकी छु," निशाले भनिन् ।

अन्तर्राष्ट्रिय बालिका दिवसको अवसरमा प्लान इन्टरनेशनल नेपालको डिजिटल टेक ओभर कार्यक्रम अन्तर्गत् बागेश्वरी पोष्ट डट कममा उनी एक दिनका लागि अतिथि सम्पादक बनेर जिम्मेवारी निर्वाह गर्दै थिइन् । शुक्रबार बागेश्वरी पोष्टको भृकुटीनगरस्थित कार्यालयमा बालविवाह सम्बन्धि समाचार सम्पादन गर्दै उनले भनिन्–"बालविवाह गर्ने बालक र बालिका दुबैको नाम खुलाउन हुँदैन रहेछ भन्ने थाहा पाएँ, कुनै काल्पनिक नाम लेखेर (नाम परिवर्तन) लेख्नुपर्ने रहेछ, त्यो थाहा पाएपछि समाचारमा त्यही अनुसार मिलाएँ, उनले थपिन्- "गाउँ टोल स्पष्ट खुलाउँदा पनि पहिचान खुल्न सक्ने भएकाले टोलको नाम समेत हटाएँ ।"

"बालविवाहको समाचार बनाउँदा समाचारलाई पुष्टि गर्ने तथ्य, तथ्यांक र स्रोतहरु उल्लेख भए नभएको बारे पनि चनाखो हुनुपर्ने रहेछ," उनले अनुभव सुनाइन् । एक दिनको काम गराईले आफूलाई पत्रकारिता लाग्न प्रेरित गरेको निशाले सुनाइन् । कार्यक्रममा उपस्थित प्लान इन्टरनेशनल नेपालकी आशा बुढाले किशारकिशोरीको लेख्न कलाको विकास लागि अनलाइन तालिम दिएको बताइन् । उनले आफ्नो इस्यु आफैं पहिचान गरेर त्यसलाई आफैं लेख्न सक्ने गरी उनीहरुको बृत्ति विकास गर्न उनीहरुलाई यस कार्यमा संलग्न गराएको बताइन् ।

किशोरीलाई त्यस अवसरमा बागेश्वरी पोष्टका सम्पादक नवीन गिरीले समाचारको पहिचान, लेखन, सम्पादन गर्ने तरिकाबारे सिकाएका थिए । प्रबन्ध निर्देशक गौरव गिरीले समाचार/फोटो अपलोड, अपलोड भएको समाचारलाई सामाजिक सञ्जालमा शेर गर्ने तरिकाबारे सिकाएका थिए । त्यस अवसरमा प्रमुख समाचारदाता सौरभ गिरीको पनि उपस्थिति थियो ।

प्रकाशित मिति: शनिबार, असोज २४, २०७७ ०९:३०

प्रतिक्रिया दिनुहोस्