भेरीमा धमाधम आइसोलेसन निर्माण हुँदै

समाचार

गृहपृष्ठ
समाचार
भेरीमा धमाधम आइसोलेसन निर्माण हुँदै

भेरीमा धमाधम आइसोलेसन निर्माण हुँदै

मंगलबार, असोज २७, २०७७ बागेश्वरी पोस्ट

नेपालगञ्ज । भेरी अस्पतालमा थप ७५ बेडसहितको आइसोलेसन निर्माण कार्य धमाधम भइरहेको छ । भेरी अस्पतालमा अक्सिजन सुविधासहित ७२ बेडको कोरोना विशेष अस्पताल सञ्चालनमा ल्याइए पनि लक्षणसहितका गम्भीर विरामीहरुको संख्या बढ्दै गएपछि सम्वाद समूह बाँकले थप आइसोलेसनको आवश्यकताका सन्दर्भमा सम्वाद सहजीकरण गरेको हो ।

कोरोना संक्रमितको सहज र प्रभावकारी उपचारका लागि सम्वाद समूह बाँकले गत असोज ११ गते सरोकारवालासंग अन्तर सम्वाद गरेपछि आइसोलेसन निर्माण, व्यवस्थापनको तदारुकता बढाइएको हो । अहिले भेन्टिलेटरसहितको सुविधायुक्त आइसोलेसन निर्माण कार्य भइरहेको छ । एक हप्ताभित्रै आवश्यक संरचना निर्माण गर्ने तयारी गरिएपनि स्टोर गरिएका सरसामान व्यवस्थापन गर्नेदेखि प्राविधिक तयारी पूरा गर्दा अझै केही समय लाग्ने भेरी अस्पतालका कोभिड-१९ कमाण्डर डा. श्याम सुन्दर यादवले जानकारी दिनुभयो ।

नेपालगञ्ज उपमहागरपालिकाको अगुवाईमा उपभोक्ता समिति गठन गरेर दोस्रो तलाका दुई स्थानमा अक्सिजन, शौचालय सहितको संरचना निर्माण गरिँदैछ । आइसोलेसन निर्माणका लागि जिल्ला समन्वय समितिको शिक्षा तथा आकस्मिक कोष र ८ वटै स्थानीय तहबाट एक करोड सहयोग प्राप्त भएको छ भने नेपाल सरकारको सहयोग पनि थपिँदैछ । कोरोनाका गम्भीर संक्रमितलाई राखेर प्रभावकारी उपचार गर्नकै लागि आइसोलेसन सञ्चालन गरिन लागिएको अस्पताल विकास समितिका अध्यक्ष प्रमोद धितालले जानकारी दिनुभयो । अध्यक्ष धितालका अनुसार—फल सिलिङ, ढोका झ्याल, एसी जडानका काम भइरहेको छ ।

यसैबीच सम्वाद समूह बाँकेका तर्फबाट आइसोलेसन निर्माणको स्थलगत अवलोकनका साथै सरोकारवालासँग आवश्यक सम्वाद तथा परामर्श समेत गरिएको छ । समूहका सहजकर्ता शुक्रऋषि चौलागाई, सदस्य एवं अधिवक्ता विश्वजित तिवारी, बाँकेका प्रमुख जिल्ला अधिकारी एवं जिल्ला कोभिड-१९ संकट व्यवस्थापन केन्द्रका प्रमुख राम बहादुर कुरुम्वाङ, अस्पताल विकास समितिका अध्यक्ष प्रमोद धिताल, भेरी अस्पतालका कोभिड-१९ कमाण्डर डा. श्याम सुन्दर यादव, निर्माण उपसमितिका संयोजक विजय गुप्तासहितको टोलीले निर्माण अवस्थाबारे चासो राख्दै आवश्यक छलफल गरेको हो ।

अवलोकनपछि अध्यक्ष धितालको कार्यकक्षमा गरिएको अन्तरसम्वादमा प्रमुख जिल्ला अधिकारी कुरुम्वाङले कोरोनाको प्रभावकारी उपचारका लागि नागरिकस्तरबाट निरन्तर खवरदारी र सहयोगको आवश्यकता औंल्याउनुभयो । मेसु डा. प्रकाश थापाले दशैं लगत्तै उपचार शुरु हुने गरी तयारी गरिएको अवगत गराउनुभयो । डा. यादवले अझै थप आइसोलेसन निर्माणमा जोड दिनुभयो ।

प्रकाशित मिति: मंगलबार, असोज २७, २०७७ १४:४४

प्रतिक्रिया दिनुहोस्