वाटरपार्क परियोजनाका जग्गाधनीलाई स्थायी पुर्जा

समाचार

गृहपृष्ठ
समाचार
वाटरपार्क परियोजनाका जग्गाधनीलाई स्थायी पुर्जा

वाटरपार्क परियोजनाका जग्गाधनीलाई स्थायी पुर्जा

आइतबार, कात्तिक २, २०७७ बागेश्वरी पोस्ट

नेपालगन्ज । नेपालगञ्ज उपमहानगरपालिकाको वडा नम्बर १ र १८ मा रहेको वाटरपार्क जग्गा एकिकरण परियोजना अन्तर्गतका जग्गाधनीहरुलाई स्थायी लालपुर्जा वितरण सुरु गरिएको छ । एक दशकपछि स्थायी प्रमाणपत्र प्राप्त गरेपछि जग्गाधनीहरु उत्साहित भएका छन् ।

नगर प्रमुख डा. धवलशम्शेर राणा, प्रमुख प्रशासकीय अधिकृत ओमवहादुर खड्काले आज उपमहानगरपालिका कार्यालयमा आयोजित कार्यक्रममा जग्गाधनीहरुलाई स्थायी लालपुर्जा हस्तान्तरण गर्नुभयो । जग्गाधनीलाई स्थायी लालपुर्जा हस्तान्तरण गर्दै नगर प्रमुख राणाले लामो समयको प्रयासपछि वाटरपार्क परियोजनाको सम्पूर्ण कानूनी प्रक्रिया पुरा भई सम्पन्न हुने चरणमा पुगेको जानकारी दिनुभयो । स्थायी पुर्जा वितरण सकिए लगत्तै सडक, खानेपानी, विद्युत लगायतका कामका लागि ८० करोड बढीको टेण्डर प्रक्रियामा रहेको जानकारी दिनुभयो ।

वाटरपार्क परियोजना अन्तर्गत घर निर्माणका लागि एकरुपता दिइने भएको छ । घरको डिजाईन र रङ एकै प्रकारको हुने भएको छ । डेढ वर्षभित्र सम्पूर्ण रुपमा परियोजनाको निर्माण कार्य सम्पन्न गर्ने गरी तयारी भइरहेको नगर प्रमुख राणाको भनाई छ ।

२०६७ सालमा आयोजना स्वीकृत भएको हो । अब स्थायी पुर्जा प्राप्त भएपछि स्थानीयले घर निर्माण लगायतका अन्य कार्य गर्न पाउने भएका छन् । वाटरपार्क परियोजना अन्तर्गत ६६२ जनालाई स्थायी पुर्जा वितरण गरिंँदैछ । बाँकि रहेको जग्गा भने प्लटिङ गरी विक्रि गरिनेछ । वाटरपार्क परियोजना अन्तर्गत ६५ विघा जग्गा रहेको छ । जग्गाको न्यूनतम मुल्यांकन समेत भइसकेको छ ।

वाटरपार्क आयोजना अन्तर्गतका जग्गाधनी बलवहादुर चन्दले नेपालगञ्ज नगर विकास समितिमा जनप्रतिनिधिहरुको नेतृत्व भएपछि काम तिव्ररुपमा सञ्चालन भई जग्गाधनी स्थायी पुर्जा पाउन सफल भएको बताउनुभयो ।

प्रकाशित मिति: आइतबार, कात्तिक २, २०७७ १७:०३

प्रतिक्रिया दिनुहोस्