प्रधानमन्त्री र मन्त्रीको दसैं खर्च कोरोना कोषमा जम्मा

राजनीति

गृहपृष्ठ
राजनीति
प्रधानमन्त्री र मन्त्रीको दसैं खर्च कोरोना कोषमा जम्मा

प्रधानमन्त्री र मन्त्रीको दसैं खर्च कोरोना कोषमा जम्मा

सोमबार, कात्तिक ३, २०७७ बागेश्वरी पोस्ट

सञ्चार तथा सूचना प्रविधि मन्त्री पार्वत गुरुङ

नेपालगन्ज । प्रधानमन्त्री केपी शर्मा ओली र मन्त्रिपरिषद्का सबै मन्त्रीले आफूले पाउने दशैं खर्च कोरोना कोषमा जम्मा गर्ने भएका छन् ।
मन्त्रिपरिषद्का निर्णय सार्वजनिक गर्न सोमबार सिंहदरबारमा आयोजित पत्रकार सम्मेलनमा सरकारका प्रवक्ता सञ्चार तथा सूचना प्रविधि मन्त्री पार्वत गुरूङले प्रधानमन्त्रीसहित सबै मन्त्रीहरुले दशैं खर्च कोषमा जम्मा गर्ने निर्णय गरेको जानकारी दिए ।

उनले प्रदेश र स्थानीय तहका पदाधिकारीलाई पनि दसैं भत्ता कोरोना कोषमा जम्मा गर्न आग्रह गरे । मन्त्रिपरिषद्को निर्णय सार्वजनिक गर्दै प्रवक्ता गुरुङले नेपालभरका श्रम सम्बन्धी मुद्दा हेर्ने, अधिकार क्षेत्र तोक्ने र काठमाडौं मुकाम रहने गरी श्रम अदालत गठन निर्णय भएको जानकारी दिए ।

अदालतको अध्यक्षमा रामप्रसाद ओली र सदस्यमा प्रेमकुमार राई र नीशा बानियालाई नियुक्त गरिएको छ । त्यस्तै नेपाली सेनाका प्राविधिक महासेनानी गजेन्द्रनाथ कर्माचार्यको पदावधि थप गर्ने निर्णय बैठकले गरेको प्रवक्ता गुरुङले जानकारी दिए ।

मन्त्रिपरिषद् बैठकले पछिल्लो समय सार्वजनिक सवारीसाधन सञ्‍चालनमा सहजता भएको भन्दै लकडाउन हुनुअघिकै भाडादर कायम गर्ने निर्णय गरेको छ । प्रवक्ता गुरुङका अनुसार आन्तरिक हवाई उडानमा पनि सोही व्यवस्था लागू गरिएको छ ।

‘प्रदेश र स्थानीय सरकारबाट पनि नेपाल सरकारबाट भएको निर्णयानुसार कोरोना कोषमा हाल्न आह्वान गरिएको छ,’ उनले भने । मन्त्री गुरुङले यो वर्षको दशैं सामान्य रुपमा घर परिवारमा सीमित रही मनाउनुपर्ने बाध्यता रहेको पनि सुनाए । ‘संकटलाई मनन गरी त्यही अनुरुप सबैले गर्नुपर्ने आवश्यकता छ’, उनले भने, ‘यस पटकको दशैं सामान्य रुपमा घरपरिवारका सदस्यले मात्रै मनाउनु होला ।’

प्रकाशित मिति: सोमबार, कात्तिक ३, २०७७ १९:२१

प्रतिक्रिया दिनुहोस्