कृषि ज्ञान केन्द्र बाँकेद्वारा ०७७/८८ को कार्यक्रम सार्वजनिक

समाचार

गृहपृष्ठ
समाचार
कृषि ज्ञान केन्द्र बाँकेद्वारा ०७७/८८ को कार्यक्रम सार्वजनिक

कृषि ज्ञान केन्द्र बाँकेद्वारा ०७७/८८ को कार्यक्रम सार्वजनिक

शुक्रबार, कात्तिक २८, २०७७ बागेश्वरी पोस्ट

कृषि ज्ञान केन्द्र बाँकेका प्रमुख सागर ढकाल

नेपालगन्ज । कृषि ज्ञान केन्द्र बाँकेले आर्थिक वर्ष २०७७/८८ को वार्षिक कार्यक्रम स्थानीय रेडियोहरुबाट एकैसाथ प्रत्यक्ष प्रसारण गरी सार्वजनिक गरेको छ । कोरोना कहरका बीच धेरै सहभागी उपस्थित गराउन नसकिने भएको भन्दै ज्ञान केन्द्र बाँकेले स्थानीय रेडियो र पत्रकार भेटघाट गरी सञ्चार माध्यमद्वारा वार्षिक कार्यक्रमको सार्वजनिक गरेको हो ।

ज्ञान केन्द्रले १४ करोड ५५ लाख १४ हजारको कार्यक्रम प्रस्तुत गरेको हो । ज्ञान केन्द्रले चालू आर्थिक वर्षमा सञ्चालन गर्ने कार्यक्रमहरु स्मार्ट कृषि गाउँ, लसुन तथा प्याज मिसन कार्यक्रम, प्रधानमन्त्री कृषि आधुनिकीकरण परियोजना अन्तर्गत्को पकेट विकास कार्यक्रम, ब्लक विकास कार्यक्रम, स्थानीय तहको सहकार्यमा करार खेती कार्यक्रम रहेका छन् ।

त्यस्तै यस आर्थिक वर्षमा सुरु हुने कार्यक्रममा रोड कोरिडोर सडक मार्ग लक्षित तरकारी उत्पादन कार्यक्रम, आलु तथा मकै अभियानमुखी उत्पादन कार्यक्रम , बीउ भण्डारण पूर्वाधार निर्माण, कस्टम हायरिंग सेन्टर निर्माण, कृषि पर्यटन प्रबर्द्धन कार्यक्रम, हरित स्वयंसेवक परिचालन तथा सुलभ कर्जा सहजीकरण र बजारमुखी धान उत्पादन प्रबर्द्धन कार्यक्रम लगायतका रहेको कृषि ज्ञान केन्द्रका प्रमुख सागर ढकालले जानकारी दिनुभयो।

कार्यक्रममा पत्रकार महासंघ बाँकेका अध्यक्ष ठाकुर सिंह थारुले स्मार्ट कृषि गाउँ कार्यक्रमको कार्यान्वयनमा ध्यान दिन सुझाब दिनुभयो । खेतीयोग्य जमिनको संरक्षण अहिलेको मुख्य चुनौति भएको भन्दै उहाँले त्यसतर्फ पनि राज्यको ध्यानाकर्षण हुनुपर्ने बताउनुभयो । कार्यालयका अधिकृत दिनेश प्रसाद भट्टराईले सहजीकरण गर्नुभएको कार्यक्रममा बागवानी विकास अधिकृत शम्भुनाथ, कृषि प्रसार अधिकृत शारदा ज्ञवाली, पत्रकार लगायतको सहभागिता थियो ।

प्रकाशित मिति: शुक्रबार, कात्तिक २८, २०७७ १३:००

प्रतिक्रिया दिनुहोस्