नेपालगञ्जमा बाख्राको मासु बिक्रि गर्नेलाई ५० हजार जरिवाना

समाचार

गृहपृष्ठ
समाचार
नेपालगञ्जमा बाख्राको मासु बिक्रि गर्नेलाई ५० हजार जरिवाना

नेपालगञ्जमा बाख्राको मासु बिक्रि गर्नेलाई ५० हजार जरिवाना

शुक्रबार, कात्तिक २८, २०७७ बागेश्वरी पोस्ट

नेपालगञ्ज । नेपालगञ्ज उपमहानगरपालिका अन्तर्गत्को उपभोक्ता हित संरक्षण समितिले नेपालगञ्जमा रहेका मासु पसलको आज अनुगमन गरेको छ । अनुगमनका क्रममा केही फ्रेस हाउसमा खसीको मासु भनेर बाख्राको मासु बिक्रि गरिरहेको पाइएको छ । यसैगरी बिना अनुमति पसल सञ्चालन गरेको पाइएको छ ।

अनुगमन टोलीले नेपालगञ्जको बागेश्वरी हलरोडमा रहेको थ्री स्टार फ्रेस हाउसलाई ५० हजार जरिवाना सहित बन्द गराएको छ । वाणिज्य कार्यालयले जरिवाना गराएको हो । सो पसलमा बाख्राको मासुलाई खसीको भन्दै बिक्रि गरेको तथा खान अयोग्य, सडेको मासु बिक्रिका लागि राखिएको पाइएको नेपालगञ्ज उपमहानगरपालिकाका अधिकृत दिपेन्द्र श्रेष्ठले जानकारी दिनुभयो । पसलबाट खान अयोग्य ३५ किलो मासु र ९ किलो माछा नियन्त्रणमा लिई नष्ट गरिएको छ । पसलमा राखिएका चार वटा बाख्रा समेत टोलीले नियन्त्रणमा लिएको छ ।

यसैगरी फुल्टेक्रामा रहेको आवेश दाना सप्लायर्समा बिना दर्ता मासु बिक्रि बितरण भएको पाइएकाले दर्ता नहुँदासम्म ब्यवसाय बन्द गर्न टोलीले निर्देशन दिएको छ । अनुगमन टोलीमा बाणिज्य आपूर्ति तथा उपभोक्ता संरक्षण कार्यालयका प्रमुख कृष्ण पौडेल, जिल्ला प्रशासन कार्यालयका प्रशासकीय अधिकृत हरिश्चन्द्र शर्मा, खाद्य प्रविधि कार्यालयका विवेककुमार सुवेदी, उपभोक्ता हित संरक्षण मञ्चका प्रभातकुमार ठकुरी, नेपालगञ्ज उपमहानगरपालिकाका पशु सेवा शाखा प्रमुख लक्ष्मी शाही लगायतको सहभागिता रहेको थियो ।

उपभोक्ता हित संरक्षण समितिका संयोजक तथा नेपालगञ्ज उपमहानगरपालिकाका उपप्रमुख उमा थापा मगरले बजार अनुगमनसँगै उपभोक्ता सचेतनामा पनि जोड दिन अभियान सञ्चालन गरिने बताउनुभयो ।

प्रकाशित मिति: शुक्रबार, कात्तिक २८, २०७७ १३:०९

प्रतिक्रिया दिनुहोस्