खजुरामा जैविक विषादी उत्पादन तालिम

समाचार

गृहपृष्ठ
समाचार
खजुरामा जैविक विषादी उत्पादन तालिम

खजुरामा जैविक विषादी उत्पादन तालिम

मंगलबार, मंसिर ३०, २०७७ बागेश्वरी पोस्ट

खजुरा(बाँके) । बाँकेको खजुरामा सञ्चालित जैविक विषादी ट्राइकोडर्मा र एन.पि.भी. उत्पादन तथा परिक्षण सम्बन्धि पाँच दिने तालिम आज सम्पन्न भएको छ । बाली संरक्षण प्रयोगशाला खजुराको आयोजनामा २६ गतेदेखि शुरु भएको तालिम आज समापन भएको हो ।

ट्राइकोडर्मालाई टाल्कम पाउडरमा उत्पादन गरी कृषक समक्ष पुर्याउने उद्देश्यले तालिम आयोजना गरिएको प्रयोगशाला प्रमुख नरेश धितालले जानकारी दिनुभयो । प्रांगारिक विषादीको प्रयोग बढाउन प्रयोगशाला प्रयासरत रहेको धितालले बताउनुभयो ।

रासायनिक ढुसीनाशक विषादीलाई कटौति एवम् प्रतिष्थापन गर्दै जैविक विषादीको प्रयोग बढाउन विषादी उत्पादन र परिक्षण गर्न लुम्बिनी प्रदेशका कृषि प्राविधिक, आइपिएम कृषक सहजकर्ता र उत्कृष्ट ओजेटीलाई तालिम दिइएको सूचना अधिकारी बाली संरक्षण अधिकृत कोमल शाहीले बताउनुभयो । शाहीले तालिम पश्चात् दुई हजार प्याकेट ट्राइकोडर्मा उत्पादन गरेर कृषक समक्ष पुर्याउने लक्ष्य लिइएको बताउनुभयो । तालिममा प्रयोगशाला प्रमुख धिताल, बाली संरक्षण अधिकृत शाही, प्राविधिक अधिकृत बशिष्ठ आचार्य र बायो मेडिकल इन्जिनियर नेत्र सापकोटाले प्रशिक्षण दिनुभएको थियो ।

लुम्बिनी प्रदेश भूमी व्यवस्था कृषि तथा सहकारी मन्त्रालयले प्रदेशलाई प्रांगारिक उन्मुख बनाउने नीति अख्तियार गरेकाले यो कार्यक्रमको योजना तर्जुमा गरिएको प्रयोगशाला प्रमुख धितालले बताउनुभयो । तालिमका केही सहभागीले आगामी दिनमा जैविक विषादी उत्पादन स्रोत केन्द्र स्थापना गर्ने अपेक्षा प्रयोगशालाले गरेको छ । उत्पादन पश्चात् ६ देखि ९ महिनासम्म ट्राइकोडर्मालाई टाल्कम पाउडरमा उत्पादन गरी प्रयोग गर्न सकिने भएका कारण यसको व्यवसायीकरणमा जोड दिने प्रयोगशालाको भनाई छ ।