नेपालगञ्जमा गर्जिए गगन-"संसद्बाट भाग्ने कायर प्रधानमन्त्रीले संविधानलाई धुजाधुजा पार्ने दुष्साहस गरे"

राजनीति

गृहपृष्ठ
राजनीति
नेपालगञ्जमा गर्जिए गगन-"संसद्बाट भाग्ने कायर प्रधानमन्त्रीले संविधानलाई धुजाधुजा पार्ने दुष्साहस गरे"

नेपालगञ्जमा गर्जिए गगन-"संसद्बाट भाग्ने कायर प्रधानमन्त्रीले संविधानलाई धुजाधुजा पार्ने दुष्साहस गरे"

सोमबार, पुस १३, २०७७ बागेश्वरी पोस्ट

नेपालगञ्ज । नेपाली कांग्रेसका युवा नेता गगन थापाले प्रधानमन्त्री केपी शर्मा ओलीको अहंकारले संसद् विघटन भएको बताउनुभएको छ । अहंकारी प्रधानमन्त्री ओलीको मतियार बनेर राष्ट्रपति विद्यादेवी भण्डारीले संसद्को हत्या गर्ने दुष्साहस गरेको थापाले टिप्पणी गर्नुभयो ।

नेपाली कांग्रेस बाँके क्षेत्र नम्बर २ ले आज नेपालगञ्जको त्रिभुवनचोकमा आयोजना गरेको विरोधसभालाई सम्बोधन गर्दै कांग्रेस केन्द्रिय सदस्य एवम् पूर्व मन्त्री समेत रहनुभएका थापाले भन्नुभयो–“जनमतको अपमान गर्ने केपी ओलीको असंवैधानिक कदमका विरुद्ध कांग्रेस सडकमा आएको हो, संविधानको रक्षार्थ कांग्रेस आन्दोलनमा उत्रिएको हो ।”

संसद्बाट भाग्ने प्रधानमन्त्री केपी ओली क्रान्तिकारी नभई कायर भएको थापाको टिप्पणी छ । “संसद्मा टाउको गन्दा संख्या नपुगेपछि कायर प्रधानमन्त्रीले संविधानमै नभएको अधिकार प्रयोग गरी सर्वसत्ताबादी शैलीमा संसद् विघटन गरेका छन्, राष्ट्रपति र प्रधानमन्त्रीको जालझेलपूर्ण दुष्साहसी कदमले जनमतको अपहरण गरेको छ,” थापाले भन्नुभयो । “पार्टीभित्रको झगडा मिलाउन नसक्ने अनि त्यसको भारी हामीलाई बोकाउने ?”–थापाको प्रश्न छ । नेपाली जनताले बनाएको संविधानलाई धुजाधुजा पार्ने अपराध प्रधानमन्त्रीले गरेको र त्यो अपराधको मतियार राष्ट्रपति भएको थापाले बताउनुभयो ।

उहाँले सर्वोच्च अदालतप्रति कांग्रेसका आस्था र विश्वास रहेको बताउँदै अब संसद् पुनःस्थापनाको विकल्प नरहेको बताउनुभयो । “अदालतले न्याय दिने कुरामा हामी ढुक्क छौं, यही संविधानलाई छातीमा टाँसेर सपथ खाएका न्यायमूर्तिहरुले यो संविधानलाई मर्न दिनुहुन्न भन्ने हाम्रो विश्वास छ ।” थापाले भन्नुभयो । अदालत पनि न्याय दिन चुक्यो भने जनताको अदालतमा गएर कांग्रेसले संविधानको रक्षा गर्ने नेता थापाको भनाई छ । क्षेत्रीय सभापति रमेश कुमार गुप्ताको सभापतित्वमा भएको कार्यक्रममा जिल्ला सभापति किरण कोइराला, कांग्रेस नेता लुम्बिनी एवम् प्रदेश सभा सांसद् मोहम्मद याकुव अन्सारी र नेपालगञ्ज नगर सभापति प्रशान्त विष्टले बोल्नुभएको थियो । कार्यक्रमको संचालन क्षेत्रीय सचिव सुनिलसिंह हमालले गर्नुभएको थियो ।