बालविवाह न्यूनीकरणमा सकारात्मक पुरुषत्वको भूमिका सम्बन्धि तालिम सम्पन्न

समाचार

गृहपृष्ठ
समाचार
बालविवाह न्यूनीकरणमा सकारात्मक पुरुषत्वको भूमिका सम्बन्धि तालिम सम्पन्न

बालविवाह न्यूनीकरणमा सकारात्मक पुरुषत्वको भूमिका सम्बन्धि तालिम सम्पन्न

बुधबार, पुस १५, २०७७ बागेश्वरी पोस्ट

गंगापुर(बाँके) । बाँकेको नरैनापुर गाउँपालिका वडा नम्बर ६ मा सञ्चालित बालविवाह न्यूनीकरणमा सकारात्मक पुरुषत्वको भूमिका सम्बन्धि दुई दिने तालिम आज सम्पन्न भएको छ ।

प्लान इन्टरनेशनल नेपाल क्षेत्रीय कार्यालय सुर्खेतको सहयोग तथा सामाजिक सचेतन सरोकार मञ्च (स्याक) नेपालको आयोजनामा भएको तालिममा २५ जना सहभागी थिए । तालिममा बालविवाह न्यूनीकरण गर्न पुरुषले खेल्नुपर्ने भूमिकाका विषयमा छलफल गरिएको थियो । बालविवाह न्यूनीकरण गर्न पुरुषको संलग्नता बढाउँदै बाल विवाहमुक्त वडा घोषणाका लागि प्रतिबद्ध बनाउने उद्देश्यका साथ तालिम आयोजना गरिएको स्याक नेपालका फिल्ड सुपरभाइजर त्रिभुवन प्रसाद यादवले बताउनुभयो ।

तालिममा लैंगिक सवाल, लैंगिक हिंसा, निर्णय प्रक्रियामा पुरुष र महिलाबीचको भूमिका, समाज परिवर्तनमा पुरुषको भूमिका, बालविवाह न्यूनीकरण गर्न पुरुषको महत्व, संलग्नता लगायतका विषयमा पत्रकार नवीन गिरीले सहजीकरण गर्नुभएको थियो । त्यस अवसरमा सहभागीहरुबाट बालविवाह न्यूनीकरणका लागि कार्ययोजना तयार गराउनुका साथै प्रतिबद्धता संकलन गरिएको थियो ।

तालिम समापन कार्यक्रममा बोल्दै वडा नम्बर ६ का अध्यक्ष विरेन्द्रपाल सिंहले पुरुषप्रधान समाजमा सकारात्मक पुुरुषत्वले बालविवाह न्यूनीकरणमा अहम् भूमिका खेल्ने बताउनुभयो । छोराछोरी दुवैलाई भेदभाव नगरी पढाउनेतिर ध्यान केन्द्रित गरे बालविवाह स्वतः कम हुँदै जाने वडा अध्यक्ष पालको भनाई छ । नरैनापुर गाउँपालिकाको महिला तथा बालबालिका शाखा प्रमुख कृष्णा कुमारी चन्दले छोरीहरुलाई बोझ सम्झेर विभेद गर्दा पढाउनुको साटो बालविवाह गर्न अभिभावकहरु हतारिने गरेको बताउनुभयो ।

प्रकाशित मिति: बुधबार, पुस १५, २०७७ १८:३८

प्रतिक्रिया दिनुहोस्