थारुहरुले माघी मनाउँदै, थारु बस्तीमा रौनक

समाचार

गृहपृष्ठ
समाचार
थारुहरुले माघी मनाउँदै, थारु बस्तीमा रौनक

थारुहरुले माघी मनाउँदै, थारु बस्तीमा रौनक

बिहीबार, माघ १, २०७७ बागेश्वरी पोस्ट

नेपालगञ्ज । थारू समुदायको सबैभन्दा ठूलो र महत्वपूर्ण चाडको रुपमा मनाइने माघी आज मनाइँदैछ । थारुहरुले यो पर्व माघको पहिलो हप्ताभर मनाउँछन् । माघी थारुहरुको नयाँ बर्ष पनि हो । रोजगारीका सिलसिलामा घर बाहिर भएकाहरु घर फर्किएकाले गाउँघरको वातावरण नै रमाइलो भएको छ । माघलाई विभिन्न ठाउँका थारू समुदायले आ–आफ्नो परम्परा अनुसार माघ, खिचरा, तिला सङ्कराइत नामले मनाउँदै आएको पाइन्छ ।

केही वर्ष पहिले थारू समुदायका अधिकांश छोरीहरु कमलरी थिए । उनीहरु माघका दिन मात्रै छुट्टी पाउँथे । त्यसैले यसलाई मुक्ति दिवसका रुपमा पनि मनाइन्छ । माघीमा ढिक्री, रोटी, जाँड पकाउने गरिन्छ । सुंगुरको मासु, माछा र घोँगी परिकार पनि बनाइन्छ । यसपाली कोरोनाका कारण नाचगानको कार्यक्रम छैन । तर, खानाको परिकार बनाउन भ्याई–नभ्याई छ । कामको सिलसिलामा घरदेखि टाढा भएका दाजुभाइ, दिदीबहिनी घरमा आउनेको सङ्ख्या बढेको छ । गाउँमा छुट्टै चहलपहल र भेटघाट भएकाले रमाइलो छ ।

थारू समुदायले माघमै आफ्नो मुखिया चुन्ने, चौकीदार, घरको मूली चुन्ने, नयाँ नियम लागु गर्ने, संशोधन गर्ने भएकाले पनि यसलाई विशेषरूपमा लिइँदै आएको थारू अगुवाहरु बताउँछन् । सधैँ काममा व्यस्त रहने थारू समुदाय माघको समयमा फुसर्दिला हुने र खानपिन गरेर आफ्ना साथीसङ्गीसँग रमाइलो गर्ने गर्दछन् ।

माघी पर्वका अवसरमा नेपाल सरकारले आज र लुम्बिनी प्रदेश सरकारले आज र भोलि सार्वजनिक विदा दिएको छ । थारु बाहुल विभिन्न स्थानीय तहहरुले तीन दिनसम्म पनि विदा दिएका छन् । आजको दिनलाई नेपालीहरुले माघे संक्रान्तिका रुपमा विशेष महत्वका साथ पनि मनाउने गर्दछन् । तरुल, गन्जी, सखरखण्ड, तिल, लड्डु, चाकु खाएर माघे संक्रान्ति मनाइन्छ । आज नजिकैका जलाशय, नदी, खोलामा गएर माघ स्नान गर्ने गरिन्छ ।

प्रकाशित मिति: बिहीबार, माघ १, २०७७ ०६:५०

प्रतिक्रिया दिनुहोस्