राप्तीसोनारीका जेष्ठ नागरिकलाई न्यानो कपडा र थर्मस वितरण

समाचार

गृहपृष्ठ
समाचार
राप्तीसोनारीका जेष्ठ नागरिकलाई न्यानो कपडा र थर्मस वितरण

राप्तीसोनारीका जेष्ठ नागरिकलाई न्यानो कपडा र थर्मस वितरण

सोमबार, माघ ५, २०७७ बागेश्वरी पोस्ट

नेपालगन्ज । राप्तीसोनारी गाउँपालिका वडा नम्बर ७ का जेष्ठ नागरिकलाई न्यानो कपडा र थर्मस वितरण गरिएको छ । मुख्यमन्त्री ग्रामीण विकास तथा रोजगार कार्यक्रम मार्फत् ३ सय ९६ जेष्ठ नागरिकलाई न्यानो कपडा र थर्मस वितरण गरिएको हो । पुरुषलाई ज्याकेट र थर्मस तथा महिलालाई स्वीटर र थर्मस वितरण गर्दै जिल्ला समन्वय समितिका संयोजक अजय कुमार श्रीवास्तवले लुम्बिनी प्रदेश सरकार हरेक गरिव नागरिकको दैलौमा पुगेको बताउनुभयो । संयोजक श्रीवास्तवले गरिब, विपन्न, जेष्ठ नागरिक, एकल महिला र युवाको रोजगारमूलक कार्यक्रम र क्षमता विकास गरेर सरकार यी वर्गको दैलोमा पुगेको बताउनुभयो । राप्तीसोनारी गाउँपालिकाका अध्यक्ष एवम् कार्यक्रमका पालिकास्तरीय संयोजक लाहुराम थारुले न्यानो कपडा वितरण गरेर अग्रजको सम्मान गरेको बताउनुभयो । कार्यक्रमका सहजकर्ता जमुना चालिसेले यो कार्यक्रमले राप्तीसोनारीका एकल महिलाको लागि गार्मेन्ट संचालन सहयोग, वादी जातिको सीप विकास, लोकसेवा आयोग तयारी कक्षा, नेतृत्व विकास, वारिङ्ग तालिम, मुक्तकमैयालाई बाख्रा सहयोग र जेष्ठ नागरिकलाई न्यानो कपडा सहयोग सहित करिव ५ सय परिवारमा प्रत्यक्षरुपमा कार्यक्रम मार्फत् सहयोग गरेको जानकारी दिनुभयो । उहाँले कार्यक्रमको उद्देश्य अनुसार नागरिकलाई सम्मान गरेको बताउनुभयो । कार्यक्रममा वडा नं. ७ का वडा अध्यक्ष रामलखन थारु, समितिका सदस्य चमेली वाकवल, पूर्ण चौधरी, नेकपाका नेता लालबहादुर थापा लगायतले जेष्ठ नागरिकलाई सम्मान गरेकोमा प्रशंसा गर्नुभएको थियो ।

प्रकाशित मिति: सोमबार, माघ ५, २०७७ २१:०२

प्रतिक्रिया दिनुहोस्