नेपालगञ्ज उपमहानगरपालिकाद्वारा बालबालिका सम्बन्धि ऐन–२०७७ पारित

समाचार

गृहपृष्ठ
समाचार
नेपालगञ्ज उपमहानगरपालिकाद्वारा बालबालिका सम्बन्धि ऐन–२०७७ पारित

नेपालगञ्ज उपमहानगरपालिकाद्वारा बालबालिका सम्बन्धि ऐन–२०७७ पारित

बिहीबार, माघ १५, २०७७ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले बालबालिका सम्बन्धि ऐन–२०७७ पारित गरेको छ । आज भएको आठौं नगरसभाले अपांगता भएका ब्यक्तिहरुको अधिकार सम्बन्धि ऐन–२०७७ समेत पारित भएको छ । नगर प्रमुख डा. धवलशम्शेर राणाले पेश गर्नुभएका प्रस्तावहरु नगरसभाले सर्वसम्मतिले पारित गरेको हो । नगरसभाले वडागत बजेट रकमान्तरण, नगर भवन पुनःनिर्माण, अस्पतालजन्य फोहोरमैला ब्यवस्थापन लगायतका प्रस्ताव समेत पारित गरेको छ ।

नगरसभामा नगर प्रमुख डा. राणाले नगरभित्र लामो समयदेखि रोकिएर रहेका विकास आयोजना अघि बढेको भन्दै विकासले गति लिएको बताउनुभयो । मुख्य सडक र नालीहरुको निर्माण सम्पन्न भएको छ, नगर प्रमुख राणाले भन्नुभयो,–सबै पक्षको साथ र सहयोगमा विकासले फड्को मारेको छ । पार्क, सभाहल निर्माणको चरणमा रहेको, ल्याण्डफिल साइट र रंगशाला तथा बसपार्क निर्माण भएको भन्दै उहाँले क्रिकेट रंगशालाको समेत निर्माण सुरु भएको जानकारी दिनुभयो । उपप्रमुख उमा थापा मगरले जनताका अपेक्षा पूरा गर्नका लागि आफुहरु लागिपरेको बताउँदै यसबीचमा नगरबासी र कर्मचारीबाट पर्याप्त साथ र सहयोग पाएको बताउनुभयो ।

यसैबीच नगरसभाले गत वर्ष नेपालगञ्ज नगरभित्रका छाडा पशु चौपाय ब्यवस्थापनका सम्बन्धमा दुर्घटना भएको भन्दै सम्पूर्ण जिम्मेवारी उप–महानगरपालिकाले लिने निर्णय गरेको छ । कर्मचारीहरुले आदेशको पालना गर्ने क्रममा घटना भएका कारण त्यसको सम्पूर्ण जिम्मेवारी उपमहानगरपालिकाले लिने निर्णय नगरसभाले सर्वसम्मत पारित गरेको हो । उपमहानगरपालिकाले राम्रो मनसायका साथ काम गरिएपनि दुर्घटनावश घटना भएको जनाएको छ ।

नगरसभामा इन्टिग्रिटी आइकन–२०२० का विजेता जनस्वास्थ्य निरिक्षक आरती चौधरीलाई सम्मान गरिएको छ । चौधरी नेपालगञ्ज १२ मा कार्यरत रहनुभएको छ ।

प्रकाशित मिति: बिहीबार, माघ १५, २०७७ १५:४३

प्रतिक्रिया दिनुहोस्