खजुरामा जनतासंग स्थानीय सरकार कार्यक्रम सञ्चालन

समाचार

गृहपृष्ठ
समाचार
खजुरामा जनतासंग स्थानीय सरकार कार्यक्रम सञ्चालन

खजुरामा जनतासंग स्थानीय सरकार कार्यक्रम सञ्चालन

जेष्ठ नागरिकलाई निःशुल्क आँखा शिविर

सोमबार, माघ २६, २०७७ बागेश्वरी पोस्ट

खजुरा । खजुरा गाउँपालिकामा जनतासंग स्थानीय सरकार कार्यक्रम सञ्चालनमा आएको छ । जनताका समस्यासंग हातेमालो गर्ने र तत्काल समाधान हुने समस्या हल गर्ने उद्देश्यले यो कार्यक्रम चालू आर्थिक बर्षदेखि सञ्चालनमा आएको हो ।

उक्त कार्यक्रम अन्तरगत् आजदेखि जेष्ठ नागरिकलाई निःशुल्क आँखा शिविर सञ्चालनमा ल्याइएको छ । भिजन आँखा अस्पताल नेपालगन्जको सहकार्यमा वडा नम्बर १ देखि ८ सम्म यो कार्यक्रम सम्पन्न गरिनेछ । शिविरमा सामाजिक सुरक्षा भत्तामा सहभागी जेष्ठ नागरिकलाई निःशुल्क चेक जाँच, औषधि बितरण र करिब एक सय जनाको निःशुल्क अपरेशन गरिने जनाइएको छ ।

वडा नम्बर १ मा सञ्चालित शिविरको शुभारम्भ कार्यक्रममा बोल्दै खजुरा गाउँपालिकाका अध्यक्ष किष्मत कुमार कक्षपतिले जनताका प्रत्यक्ष गुनासो सुन्ने र समस्या समाधान गर्न कार्यक्रम लागू गरिएको जानकारी दिनुभयो । उहाँले समस्याको अवस्था हेरी तत्काल समाधान हुने खालका समस्यालाई हल गर्ने र समय लाग्ने खालका समस्याको आगामी नीति कार्यक्रम र बजेटमा लगिने बताउनुभयो ।

अध्यक्ष कक्षपतिले निर्वाचनमा जनतासंग बाचा गरेका ६५ बुँदा पूरा भएको र महत्वपूर्ण गौरवका योजना संचालनमा रहेको बताउनुभयो । उहाँले तीन वर्षमा ५० किलोमिटर कालोपत्रे गरिएको जनाउँदै ५ वर्ष पूरा हुँदा एक सय किलोमिटर कालोपत्र गरिने प्रतिबद्धता जनाउनुभयो । स्वास्थ्य क्षेत्रमा खजुरामा १५ वेड १८ महिनामा पूरा गर्ने, दोस्रो ठूलो अस्पताल क्यान्सर अस्पताल पूर्ण सेवा दिने तयारीमा रहेको जानकारी दिनुभयो ।

ग्रीनसिटी मार्फत् खजुराको व्यवस्थित विकासमा लाग्ने उद्देश्य रहेपनि कोरोनाले अवरोध भएको बताउँदै यो परियोजना सञ्चालनमा आउने विश्वास ब्यक्त गर्नुभयो । उहाँले असार मसान्तसम्म सुकुम्बासीको हातमा पूर्जा पर्ने गरी तयारी गरिएको बताउँदै कसैलाई एक कप चिया खुवाउनु पनि नपर्ने उल्लेख गर्नुभयो ।

खजुरा गाउँपालिका सामाजिक विकास संयोजक फत्तेकुमारी जैसीको अध्यक्षतामा भएको कार्यक्रममा स्वास्थ्य शाखा प्रमुख सुदीप पौडेल, भिजन आँखा अस्पतालका प्रबन्ध निर्देशक बाबुतरुण गौतम, वडा नम्बर १ का स्वास्थ्य प्रमुख दीपक ढकाल, स्थानीय मगनसिंह थापाले यस्ता कार्यक्रमले जनता लाभान्वित हुने विश्वास ब्यक्त गर्नुभयो ।

कार्यक्रममा प्रमुख प्रशासकीय अधिकृत मणिराम खराल, वडा नम्बर १ का वडा अध्यक्ष सुमन मल्ल, वडा नम्बर २ का अध्यक्ष देवीलाल खनाल, खजुरा गाउँपालिकाका लेखा अधिकृत प्रदिप सुनार लगायतको सहभागिता थियो ।

प्रकाशित मिति: सोमबार, माघ २६, २०७७ १४:५८

प्रतिक्रिया दिनुहोस्