बाँकेका सरकारी कार्यालय प्रमुखहरुको बैठक नरैनापुरमा सम्पन्न

समाचार

गृहपृष्ठ
समाचार
बाँकेका सरकारी कार्यालय प्रमुखहरुको बैठक नरैनापुरमा सम्पन्न

बाँकेका सरकारी कार्यालय प्रमुखहरुको बैठक नरैनापुरमा सम्पन्न

बिहीबार, मंसिर ५, २०७६ बागेश्वरी पोस्ट

नरैनापुर ( बाँके )।बाँके जिल्लाभरीका सरकारी कार्यालयका प्रमुखहरुको बैठक बिहीवार नरैनापुर गाउँपालिकामा बसेको छ। हरेक महिना नियमित रुपमा बस्दै आएको बैठक गत बर्षदेखि गाउँपालिका स्तरमा पनि बस्न थालेको हो ।

प्रमुख जिल्ला अधिकारी कुमारबहादुर खड्काको अध्यक्षता तथा बाँके क्षेत्र नम्बर १ ‘क’ की प्रदेश सभा सांसद् कृष्णा केसी नमुनाको प्रमुख आतिथ्यता एवम् नरैनापुर गाउँपालिकाका अध्यक्ष इस्तियाक अहमद शाहको विशिष्ट आतिथ्यता र सशस्त्र प्रहरी बल नम्बर ३० गण बागेश्वरी बाँकेका प्रमुख एसपी दिपक अधिकारी, बाँके जिल्ला प्रहरी प्रमुख एसपी वीर बहादुर वलीको आथित्यमा बसेको बैठकमा विकासमा पछाडि परेको नरैनापुर गाउँपालिकामा विशेष प्राथमिकताका साथ काम गर्नुपर्नेमा जोड दिइएको गाउँपालिकाका प्रमुख प्रशासकीय अधिकृत दलबहादुर बस्नेतले बताए ।

बैठकमा स्थानीय समस्यालाई समयमै समाधान गर्दै विकास निर्माणका कामलाई जनताले महसुस गर्ने गरी द्रुत गतिमा अघि बढाउनुका साथै प्रभावकारी जनसेवामा ध्यान दिनुपर्ने आवश्यकता औंल्याइएको थियो । गाउँपालिकामा रहेका विभिन्न विषयगत कार्यालयहरुलाई पनि प्रभावकारी सेवा प्रवाहका लागि प्रतिबद्ध रहनुपर्नेमा जोड दिइएको थियो। सांसद नमुनाले बर्षौंसम्म विकासमा पछि परेको बघौडा क्षेत्रको विकासका लागि आफू प्रतिबद्ध भएर लागेको बताउँदै जनतालाई प्रभावकारी सेवा सुविधा प्रवाह गर्नेदेखि विकासका काममा कार्यालय प्रमुखहरुले समन्वय र सहकार्य गर्नुपर्ने बताइन् ।

गाउँपालिका अध्यक्ष शाहले विस्तारै विकासमा गति लिँदै गरेको नरैनापुर गाउँपालिकामा सरकारी कार्यालयहरुले विशेष ध्यान दिनुपर्ने बताए । बैठकपछि प्रमुख जिल्ला अधिकारी खड्काको नेतृत्वमा रहेको सरकारी टोलीले नेपाल भारत सीमा क्षेत्रको निरीक्षणसमेत गरेको थियो । अर्को महिनाको बैठक राप्तीसोनारी गाउँपालिकामा बस्नेछ ।

प्रकाशित मिति: बिहीबार, मंसिर ५, २०७६ १९:३०