मुख्यमन्त्री राईविरूद्ध अविश्वासको प्रस्ताव पेस

राजनीति

गृहपृष्ठ
राजनीति
मुख्यमन्त्री राईविरूद्ध अविश्वासको प्रस्ताव पेस

मुख्यमन्त्री राईविरूद्ध अविश्वासको प्रस्ताव पेस

आइतबार, फागुन ९, २०७७ बागेश्वरी पोस्ट

विराटनगर । प्रदेश नम्बर–१ का मुख्यमन्त्री शेरधन राईविरूद्ध प्रदेश सभामा अविश्वासको प्रस्ताव पेस भएको छ । प्रदेश सभा सदस्य इन्द्रबहादुर आङ्बोले आइतवार (आज) बसेको प्रदेश संसद् बैठकमा मुख्यमन्त्री राईविरुद्ध अविश्वासको प्रस्ताव पेस गरेका हुन् ।

अविश्वास प्रस्ताव पेस हुनेबित्तिकै सभामुख प्रदीपकुमार भण्डारीले बैठक आगामी फागुन २० गते बिहिबार सम्मका लागि स्थगित गरेका छन् । अविश्वासको प्रस्तावमाथि २० गतेदेखि छलफल हुने बताइएको छ ।

मुख्यमन्त्री राईविरुद्ध नेकपाको प्रचण्ड–नेपाल समूहले गएको पुस १२ गते अविश्वासको प्रस्ताव दर्ता गरेको थियो । मुख्यमन्त्री राईविरुद्ध नेपालको संविधानको धारा १८८ (४) तथा प्रदेश सभा नियमावली २०७४ को १२९ (१) बमोजिम अविश्वासको प्रस्ताव पेस भएको नेकपा प्रचण्ड–नेपाल समूहले जनाएको छ ।

नेकपाको ओली समूहले नेकपा राजनीतिक रूपमा फुटे पनि कानुनी रूपमा नफुटेको भन्दै अविश्वासको प्रस्तावको वैधानिकताबारे प्रश्न उठाउँदै आएको छ । आज पनि बैठकअघि मुख्यमन्त्री शेरधन राईले सभामुखलाई पत्र पठाएर अविश्वासको प्रस्ताव वैधानिक नभएको स्मरण गराएका छन् । तर, सभामुख प्रदीपकुमार भण्डारीले प्रदेश सरकार तथा ओली पक्षका सांसदको उपस्थिति विनै बैठक राखेर मुख्यमन्त्रीविरुद्धको अविश्वास प्रस्ताव पेस गर्न अनुमति दिएका थिए ।

प्रकाशित मिति: आइतबार, फागुन ९, २०७७ १७:४९

प्रतिक्रिया दिनुहोस्