धान रोप्दा चाहिएको मल आलु खनेपछि नेपाल आउंदै

समाचार

गृहपृष्ठ
समाचार
धान रोप्दा चाहिएको मल आलु खनेपछि नेपाल आउंदै

धान रोप्दा चाहिएको मल आलु खनेपछि नेपाल आउंदै

सोमबार, फागुन २४, २०७७ बागेश्वरी पोस्ट

नेपालगन्ज। नेपाल र बङ्गलादेश सरकार (सरकार-सरकारबीच, जिटुजी)सम्झौतानुसारको पहिलो खेपको रासायनिक मल सोमवारसाँझसम्म नेपाल आइपुग्ने भएको छ ।

बङ्गलादेशबाट खरीद गरिएको ५० हजार मेट्रिकटन रासायनिक मलमध्येमा पहिलो लटमा दुई हजार ५०० टन मल नेपाल आइपुग्ने भएको हो । यस बर्ष धान रोप्ने बेला रासायनिक मल नपाएर कृषक समस्यामा परेका थिए । धान पाकेसँगै आलु रोपेर खनिए पछि मल नेपाल आउन लागेको हो ।

मल खरीदको जिम्मा पाएको कृषि सामग्री कम्पनीका अनुसार कोलकातामा ल्याइएको २२ हजार ५०० टन रासायनिक मलमध्येमा सोमवार बेलुका वा मङ्गलबार बिहानसम्म दुई हजार ५०० टन मल नेपाल आइपुग्नेछ । कोलकाताबाट रेलका ४२ डब्बामा ल्याइएको मल ढिलोमा मंगलबार बिहानसम्म वीरगञ्ज आइपुग्ने कम्पनीका प्रबन्ध सञ्चालक नेत्रबहादुर भण्डारीले जानकारी दिए ।

उनका अनुसार रेलमा ल्याइएको मल सोमवार साँझसम्म वीरगञ्जमा आइपुग्नेछ भने ट्रकमा ल्याइएको मल बुधबारसम्म विराटनगरमा पुग्नेछ । गत बिहीबार कोलकाताबाट छ ट्रकमा २५० टन मल विराटनगरका लागि ल्याइएको उनले जानकारी दिए । यसैगरी सोमवार पुनःरेलमा दुई हजार ५०० टन मल नेपालका लागि हिँडिसकेको छ ।

पहिलो लटमा रेल तथा ट्रकमार्फत आउने मल कृषि सामग्री कम्पनीको विराटनगर, वीरगन्ज र भैरहवामा रहेका गोदाममा राखिने कम्पनीले जनाएको छ । बङ्गलादेशसँग प्रतिमेट्रिक टन २५९.१९५ अमेरिकी डलरमा मल खरीदको सम्झौता भएको प्रबन्ध सञ्चालक भण्डारीले जानकारी दिए । उनका अनुसार कम्पनीबाट रासायनिक मल खरीदको अन्तीम सम्झौतानुसार बङ्गलादेशसँग प्रतिमेट्रिक टन १८ डलर कममा सम्झौता भएको हो ।

प्रकाशित मिति: सोमबार, फागुन २४, २०७७ १६:४७

प्रतिक्रिया दिनुहोस्