बालविवाह न्यूनीकरणमा सकारात्मक पुरुषत्वको भूमिका सम्बन्धि तालिम सम्पन्न

समाचार

गृहपृष्ठ
समाचार
बालविवाह न्यूनीकरणमा सकारात्मक पुरुषत्वको भूमिका सम्बन्धि तालिम सम्पन्न

बालविवाह न्यूनीकरणमा सकारात्मक पुरुषत्वको भूमिका सम्बन्धि तालिम सम्पन्न

मंगलबार, चैत १०, २०७७ बागेश्वरी पोस्ट

खजुरा (बाँके) । बाँकेको खजुरा गाउँपालिकामा सञ्चालित बालविवाह न्यूनीकरणमा सकारात्मक पुरुषत्वको भूमिका सम्बन्धि दुई दिने तालिम आज सम्पन्न भएको छ ।

प्लान इन्टरनेशनल नेपाल क्षेत्रीय कार्यालय सुर्खेतको सहयोग तथा सामाजिक सचेतन सरोकार मञ्च (स्याक) नेपालको आयोजनामा भएको तालिममा २० जना सहभागी थिए । तालिममा बालविवाह न्यूनीकरण गर्न पुरुषले खेल्नुपर्ने भूमिकाका विषयमा छलफल गरिएको थियो । बालविवाह न्यूनीकरण गर्न पुरुषको संलग्नता बढाउँदै बाल विवाहमुक्त वडा घोषणाका लागि प्रतिबद्ध बनाउने उद्देश्यका साथ तालिम आयोजना गरिएको स्याक नेपालका बालविवाह रोकथाम परियोजना संयोजक जगदिश थापाले बताउनुभयो ।

तालिममा लैंगिक सवाल, लैंगिक हिंसा, निर्णय प्रक्रियामा पुरुष र महिलाबीचको भूमिका, समाज परिवर्तनमा पुरुषको भूमिका, बालविवाह न्यूनीकरण गर्न पुरुषको महत्व, संलग्नता लगायतका विषयमा पत्रकार नवीन गिरीले सहजीकरण गर्नुभएको थियो ।

त्यस अवसरमा सहभागीहरुबाट बालविवाह न्यूनीकरणका लागि कार्ययोजना तयार गराउनुका साथै प्रतिबद्धता संकलन गरिएको थियो । तालिममा खजुरा गाउँपालिकाकी उपाध्यक्ष एकमाया विकले बालविवाह न्यूनीकरणका लागि सबैले हातेमालो गरेर संगसंगै अघि बढ्नुपर्ने बताउनुभयो । सरोकारवाला सबैको साझा प्रयासले मात्र बालविवाह जस्तो सामाजिक विकृतिलाई अन्त्य गर्न सकिने उपाध्यक्ष विकको धारणा थियो । उहाँले खजुरा गाउँपालिकालाई बालविवाह मुक्त पालिका बनाउन आफूहरु प्रतिबद्ध भएर लागेको बताउनुभयो ।

स्याक नेपालका अध्यक्ष शिवलाल पाण्डेले पुरुषप्रधान समाजमा सकारात्मक पुुरुषत्वले बालविवाह न्यूनीकरणमा अहम् भूमिका खेल्ने बताउनुभयो । बालविवाह मुक्त समाज निर्माणका लागि सरोकारवाला सबैको इमान्दार पर्यत्न जरुरी रहेको पाण्डेले बताउनुभयो । बालविवाह नहुने सुनिश्चित वातावरण सिर्जना गर्न सके त्यसले सार्थकता पाउने उहाँको भनाई छ ।

तालिमको व्यवस्थापन स्याक नेपालकी फिल्ड सुपरभाइजर कल्पना आचार्यले गर्नुभएको थियो ।