भारतमा कोरोना संक्रमण बढेपछि कञ्चनपुरमा निषेधाज्ञा जारी

स्वास्थ्य

गृहपृष्ठ
स्वास्थ्य
भारतमा कोरोना संक्रमण बढेपछि कञ्चनपुरमा निषेधाज्ञा जारी

भारतमा कोरोना संक्रमण बढेपछि कञ्चनपुरमा निषेधाज्ञा जारी

बुधबार, चैत ११, २०७७ बागेश्वरी पोस्ट

नेपालगन्ज । कञ्चनपुरमा गएरातिबाट आंशिक रूपमा निषेधाज्ञा जारी गरिएको छ । छिमेकी मुलुक भारतमा कोरोना संक्रमण बढेसँगै नेपालका सीमावर्ती क्षेत्रमा पनि प्रभाव पर्न थालेको छ ।

जिल्ला प्रशासन कार्यालय कञ्चनपुरले कोरोना भाइरसको संक्रमणको लहर नेपाल भित्रिने जोखिम रहेको भन्दै आंशिक रुपमा निषेधाज्ञा जारी गरेको छ ।

जिल्ला प्रशासन कार्यालय कञ्चनपुरले नेपाल सरकार र प्रदेश स्वास्थ्य निर्देशनालयबाट जारी निर्देशनका आधारमा जिल्लामा तोकिए बमोजिमका केही कार्य गर्न / गराउन निषेध गरिएको जनाएको छ ।

प्रशासन कार्यालयले बताए अनुसार गौरीफन्टा र गड्डाचौकी नाकाबाट यात्रुहरूको आवागमन र मालसामान ढुवानी बिहान ६ देखि बेलुका ८ बजेसम्म खुला रहने भएको छ । अन्य सबै नाका र विन्दुबाट आवतजावत पूर्णरूपमा बन्द हुने भएको छ ।

नाकामा हेल्थ डेस्कमा स्वास्थ्य जाँच गराउनु पर्ने र विवरण टिपाउन आग्रह गरिएको छ । निषेधाज्ञामा होली लगायत कुनै मेला, पर्व, जात्रा, महोत्सव, भीडभाड वा जुलुस गर्न नपाइने जिल्ला प्रशासन कार्यालय कञ्चनपुरले बताएको छ ।